პროკურორი ირაკლი ნადარეიშვილი მიხეილ სააკაშვილის ადვოკატს, რომელიც მას სახელმწიფოს ხარჯზე დაენიშნა, სიცრუეში ადანაშაულებს. სანდრო გირგვლიანის საქმის პროკურორმა ადვოკატ სოფიო გოგლიჩის მუშაობის გრაფიკი დოკუმენტაცია წარადგინა და აღნიშნა, რომ რეალურად, გოგლიჩიძე არაა იმდენად დატვირთული, რომ დასკვნითი სიტყვა ვერ მოემზადებინა.
,,ეს ინფორმაცია გამოთხოვილია როგორც პროკურატურის ორგანოებიდან, ასევე სხვა ორგანიზაციებიდან. რომ დავაჯამოთ 2 სრული დღე თუ გამოუვა მუშაობის მხრივ. შესაბამისად, ადვოკატის გრაფიკი არაა იმდენად დატვირთული, რომ მას კვლავ მოემიზეზებინა სხდომის გადადება დასკვნითი სიტყვის მოუმზადებლობის გამო. ეს ყველაფერი ემსახურება პროცესის გაჭიანურებას, რაც დაცვის მხარის ტაქტიკაა", - განაცხადა პროკურორმა.
თბილისის საქალაქო სასამართლოს მოსამართლემ გიორგი არევაძემ მიხეილ სააკაშვილის სახაზინო ადვოკატის შუამდგომლობა დააკმაყოფილა და სასამართლო განხილვა 3 იანვრამდე გადადო. ადვოკატმა მოსამართლეს სხდომის გადადების შუამდგომლობით უკვე მეორედ მიმართა, რადგან მისი თქმით, საქმის მასალების გაცნობას ვერ ასწრებს. საქმე ეხება გირგვლიანის მკვლელობაში ბრალდებულების შეწყალებას.
თავის მხრივ, ადვოკატმა სასამართლოს და პროკურორებს მისი მუშაობის განსხვავებული გრაფიკი წარუდგინა და აღნიშნა, რომ პროკურატურის და სასამართლოს გარდა, ის ამ დღეების განმავლობაში პენიტენციურ დაწესებულებებშიც იმყოფებოდა, სადაც დაცვის ქვეშ მყოფებს ხვდებოდა.
