პარლამენტს საკანონმდებლო ორგანოს ეთიკის კოდექსის პროექტი წარედგინა. ეთიკის კოდექსის დარღვევის შემთხვევაში, კანონმდებლების მიმართ დისციპლინური სანქციების გამოყენება მოხდება.
კანონპროექტის თანახმად, პარლამენტის წევრი პატივისცემით ექცევა პარლამენტის სხვა წევრებს და მოქალაქეებს, არ იყენებს სიძულვილის ენას, რომელიც მიმართულია რასის, კანის ფერის, სქესის, რელიგიის თუ სხვა ნიშნით განსაზღვრული უმცირესობებისკენ.
ასევე ეთიკის კოდექსით, პარლამენტის წევრმა პარლამენტის სხვა წევრებსა და მოქალაქეებს პატივისცემით უნდა მიმართოს. მან მოქალაქეებთან ურთიერთობისას, საჯარო გამოსვლებისას და საპარლამენტო დებატების დროს კორექტული ლექსიკა უნდა გამოიყენოს.
პროექტით, პარლამენტის წევრისთვის დაუშვებელია შეურაცხმყოფელი, პატივისა და ღირსების შემლახველი ქმედებები, უხამსი, სექსისტური, დისკრიმინაციული გამოსვლები, მიმართვები და სიძულვილის ენის გამოყენება.
პარლამენტის წევრისთვის ეთიკის წესების დაცვა სავალდებულოა როგორც საქართველოს ტერიტორიაზე, ასევე ქვეყნის გარეთ.
ეთიკის კოდექსი ეთიკის საბჭოს შექმნას ითვალისწინებს, რომელიც საკუთარი ინიციატივით ან საჩივრის საფუძველზე, კოდექსის სავარაუდო დარღვევის ფაქტებს სწავლობს.
იმ შემთხვევაში, თუ პარლამენტის წევრი ეთიკის კოდექსს დაარღვევს, მას სარეკომენდაციო ბარათი, ან გაფრთხილება მიეცემა. ასევე, გათვალისწინებულია ხელფასის დაკავებაც (ხელფასის 10 პროცენტიდან – მაქსიმუმ 50 პროცენტამდე ოდენობით) და ოფიციალურ ვიზიტებში მონაწილეობის შეჩერება (მაქსიმუმ ექვსი თვის განმავლობაში).
პროექტის მიხედვით, საქართველოს პარლამენტის ვებგვერდზე იმ დეპუტატების გვარები გამოქვეყნდება, რომლებმაც ეთიკის კოდექსი დაარღვიეს.
დოკუმენტის გათვალისწინებით, საქართველოს პარლამენტი ეთიკის კოდექსის გაცნობის მიზნით, ყოველი ახალი მოწვევის დეპუტატებისთვის ტრენინგს უზრუნველყოფს.
პარლამენტი აღნიშნულ პროექტს სავარაუდოდ, მიმდინარე კვირის რიგგარეშე სხდომებზე დაამტკიცებს.
