საქართველოს ყოფილ პრეზიდენტს, მიხეილ სააკაშვილს, მისი საზოგადოებრივი ადვოკატი კვლავ არ დაკავშირებია.
როგორც სოფიო გოგლიჩიძე აცხადებს, ის საქმის მასალებს ეცნობა და ვარაუდობს, რომ მოსამართლის მიერ მიცემულ ვადაში ათტომიანი მასალის გაცნობას ვერ მოასწრებს.
„ისევ ვეცნობი არც ისე მარტივი და არც ისე მცირე საქმის მასალებს. სავარაუდოდ, კვირის ბოლოს გადავწყვეტ თუ რა ვადას მოვითხოვ პროცესზე საქმის მასალების გასაცნობად. მიხეილ სააკაშვილს ამ დრომდე ვერ შევეხმიანე“, - განაცხადა ადვოკატმა.
შეგახსენებთ, 14 დეკემბერს, თბილისის საქალაქო სასამართლოში საქართველოს ყოფილ პრეზიდენტს, მიხეილ სააკაშვილს საზოგადოებრივი ადვოკატი დაენიშნა. სააკაშვილმა ქართულ მართლმსაჯულებას უნდობლობა გამოუცხადა და ადვოკატები აიცილა.
მას სანდრო გირგვლიანის მკვლელობის საქმის ერთ-ერთ ეპიზოდზე სახელმწიფო ბრალება უფლებამოსილების ბოროტად გამოყენებას ედავება.
სასამართლოს შემდეგი სხდომა 22 დეკემბერს ჩაინიშნა.
