„ბრალდების მხარე აღნიშნავდა, რომ საქმის მასალა 3 ტომს შეადგენდა, მაგრამ 10 ტომი და ამასთან ერთად, სხდომის დისკები გადმომცეს“, - განაცხადა „ჯი-ეიჩ-ენთან“ მიხეილ სააკაშვილის საზოგადოებრივმა ადვოკატმა, სოფიო გოგლიჩიძემ.
როგორც ადვოკატი აცხადებს, მას მოსამართლის მიერ მიცემული ერთკვირიანი ვადა არც საქმის მასალების გასაცნობად და არც დასკვნითი სიტყვის მოსამზადებლად ეყოფა.
„თავიდანვე ვიცოდი, რომ ამ საქმის გასაცნობად მცირე დრო მომცეს, ამის მიუხედავად, მე მაქსიმუმს ვაკეთებ, თუმცა, ვვარუდობ რომ ვერ მოვასწრებ“, - დასძინა გოგლიჩიძემ.
ის სააკაშვილს ამ დრომდე არ დაკავშირებია.
„ამ საქმეზე არავინ შემომხმიანებია, დაკონტაქტებას როდისთვის დავგეგმავ ჯერ არ ვიცი, ჩემთვის ამ ეტაპზე მნიშვნელოვანი საქმის გაცნობაა“, - აცხადებს ადვოკატი.
შეგახსენებთ, 14 დეკემბერს, თბილისის საქალაქო სასამართლოში საქართველოს ყოფილ პრეზიდენტს, მიხეილ სააკაშვილს საზოგადოებრივი ადვოკატი დაენიშნა. სააკაშვილმა ქართულ მართლმსაჯულებას უნდობლობა გამოუცხადა და ადვოკატები, ბექა ბასილაია და დავით კაკოიშვილი აიცილა.
მას სანდრო გირგვლიანის მკვლელობის საქმის ერთ-ერთ ეპიზოდზე სახელმწიფო ბრალება უფლებამოსილების ბოროტად გამოყენებას ედავება.
შემდეგი სასამართლოს სხდომა 22 დეკემბერს ჩაინიშნა.
