საქართველოს სავაჭრო-სამრეწველო პალატა ე.წ. „აფხაზეთის რესპუბლიკის სავაჭრო-სამრეწველო პალატის“ მიერ გავრცელებულ განცხადებას ეხმიანება, რომელიც ბელგიის სამეფოს დედაქალაქში წარმომადგენლობის გახსნის შეეხება.
საქართველოს სავაჭრო-სამრეწველო პალატაში აცხადებენ, რომ ოფიციალური ბრიუსელი საქართველოს ტერიტორიულ მთლიანობას უჭერს მხარს და ამ ფონზე ე.წ. რესპუბლიკის მხრიდან ბრიუსელში წარმომადგენლობის გახსნას არ შეიძლება ჰქონდეს ოფიციალური სახე.
„ხაზგასმით აღვნიშნავთ, რომ ოფიციალური ბრიუსელი მხარს უჭერს საქართველოს ტერიტორიულ მთლიანობას საერთაშორისო თანამეგობრობისა და საერთაშორისო ორგანიზაციების მიერ აღიარებულ საზღვრებში. შესაბამისად, არაღიარებული ე.წ. რესპუბლიკის მხრიდან ბრიუსელში წარმომადგენლობის გახსნა არალეგიტიმურია და არ შეიძლება ჰქონდეს ოფიციალური სახე.
მსგავსი ინფორმაცია დე-ფაქტო რესპუბლიკის წარმომადგენლებმა უკვე გაავრცელეს გერმანიის ფედერაციულ რესპუბლიკასთან მიმართებაში. განცხადებაში ასახული ფაქტები არ შეესაბამებოდა სიმართლეს.
საქართველოს სავაჭრო-სამრეწველო პალატა მჭიდროდ თანამშრომლობს ევროპალატასა და ბელგიის სავაჭრო-სამრეწველო პალატებთან. მათთან კომუნიკაციით ვამოწმებთ არაღიარებული რესპუბლიკის წარმომადგენლების მიერ გავრცელებულ ინფორმაციას და თანამშრომლობის ფარგლებში გავნაგრძობთ მსგავსი ფაქტების პრევენციაზე მუშაობას. ასევე, მოვითხოვთ საერთაშორისო პარტნიორებისგან, კიდევ ერთხელ მოუწოდონ წევრ კომპანიებს სიფრთხილისკენ, რათა არ მოხდეს მსგავსი არალეგიტიმური ქმედებების ხელშეწყობა“, აღნიშნულია საქართველოს სავაჭრო-სამრეწველო პალატაში.
