აჭარის რესპუბლიკური ბიუჯეტის გეგმა 9,5%-იანი, ხოლო ნაერთი ბიუჯეტის გეგმა 6,8%-იანი გადაჭარბებით შესრულდა. აჭარის ფინანსთა და ეკონომიკის სამინისტროს ინფორმაციით, აჭარის რესპუბლიკური ბიუჯეტის იანვარ-ნოემბრის გეგმა 225 მლნ 794 ათას 600 ლარი იყო, თუმცა შესრულებამ 247 მლნ 156 ათას 800  ლარი შეადგინა, ანუ გეგმა 109,5%-ით შესრულდა.

სამინისტროს ინფორმაციით, რესპუბლიკური ბიუჯეტის გადასახადების მუხლი, 11 თვის მონაცემებით, 109,6%-ით შესრულდა, სხვა შემოსავლების მუხლი 124,8%-ით, ხოლო არაფინანსური აქტივების (კლება) მუხლი მხოლოდ 90,2%-ით.

რაც შეეხება იანვარ-ნოემბრის ნაერთი ბიუჯეტის გეგმას, ის 326 მლნ 788 ათას 400 ლარი იყო, თუმცა გეგმა 6,8%-ით გადაჭარბდა და შესრულებამ 348 მლნ 991 ათას 600 ლარი შეადგინა. საბიუჯეტო მონაცემები ცხადყოფს, რომ აჭარის ნაერთი ბიუჯეტის გადასახადების მუხლი 7,7%-იანი გადაჭარბებით, სხვა შემოსავლების მუხლი 14,7%-იანი გადაჭარბებით, ხოლო არაფინანსური აქტივების (კლება) მუხლი მხოლოდ 84,3%-ითაა შესრულებული.

რაც შეეხება თვითმმართველ და მუნიციპალურ ბიუჯეტებს მათი შესრულების მონაცემები ასე გამოიყურება: ბათუმი 100,3%-ი, ქობულეთი - 92,5%-ი, ხელვაჩაური - 105,8%-ი, ქედა - 101,4%-ი, შუახევი - 103,4%-ი და ხულო - 108,5%-ი.