დონბასში მალაიზიური ბოინგის ჩამოგდების საქმის მთავარი ფიგურანტის ვინაობა გაირკვა. ერთობლივ საგამოძიებო ჯგუფ „ბელინგკეტისა“ და გამოცემა „ინსაიდერის“ ჟურნალისტების ინფორმაციით, ის რუსეთის ცენტრალური სამხედრო ოლქის მთავარი ინსპექტორი, გენერალ-პოლკოვნიკი ნიკოლაი ტკაჩევია. საქმის ფიგურანტს მანამდე „დელფინის“ მეტსახელით მოიხსენიებდნენ. ჯერჯერობით უცნობია, თუ რა წვლილი მიუძღვის გენერალს ტრაგედიაში. ის ბრალდებას კატეგორიულად უარყოფს და აცხადებს, რომ 2014 წელს უკრაინაში საერთოდ არ ყოფილა. მალაიზიური სამგზავრო თვითმფრინავი 2014 წლის ივლისში სეპარატისტთა მიერ კონტროლირებადი ტერიტორიიდან ჩამოაგდეს, რასაც 298 ადამიანი ემსხვერპლა.
