„მოულოდნელი არაფერი მომხდარა, ამას ველოდით, ეს დიდი ხანია პუტინს გეგმად აქვს დასახული“, - ასე გამოეხმაურა მიხეილ სააკაშვილის დაკავებას "ჯი-ეიჩ-ენთან" „ერთიანი ნაციონალური მოძრაობის“ წევრი, ნინო კალანდაძე.
კალანდაძის შეფასებით, სააკაშვილის დაკავება როგორც საერთაშორისო სამართლის, ასევე პოლიტიკური წესების დარღვევაა.
„სააკაშვილის დაკავება ყველაფრის დარღვევაა, რაც კი შეიძლება ადამიანმა წარმოიდგონოს, როგორც შიდა კანონმდებლობის, ასევე საერთაშორისო სამართლის, პოლიტიკური ელემენტარული წესების. ოპოზიციას ამ მეთოდებით მხოლოდ არაცივიულიზებული სახელმწიფოები უმკლავდებიან, სადაც დემოკრატიის ელემენტარული წესები არ არის დაცული.
ეს ბრძანება პუტინმა ბიძინა ივანიშვილთან გასცა, რომელმაც ეს სათანადოდ ვერ განახორციელა. ახლა ეს დავალება უკრაინის მოქმედ ხელმძღვანელობას აქვს მიღებული. ამას ემატება ისიც, რომ იქ კორუფციის მასშტაბები ისეთ ზღვარს აღწევს, სააკაშვილი პოროშენკოსთვის რეალურ საფრთხეს წარმოადგენს“, - აცხადებს კალანდაძე.
რაც შეეხება პრეზიდენტის ექსტრადირების საკითხს, როგორც კალანდაძე განმარტავს, უკრაინის ხელისუფლება ახლა კონკრეტულ ინსტრუქციებს მოსკოვიდან ელოდება.
„დავიწყოთ იმით, რომ თავადაც ინსტრუქციების მოლოდინში არიან. თუ სამართლებრივად ვიმსჯელებთ, გააჩნია რა ბრალს წაუყენებენ. თუ კანონის წესებით წავლენ, დეპორტაციის შემთხვევაში, ყველა ლოგიკით, სააკაშვილი იმ ქვეყანას უნდა გადასცენ, რომელი ქვეყნიდანაც უკრაინაში შევიდა და ეს პოლონეთია. თუმცა, რა საკვირველია, დაზღვეულები არაფრისგან ვართ...უკრაინის ხელისუფლება კონკრეტულ ინსტრუქციებს მოსკოვიდან ელოდება“, - აცხადებს კალანდაძე.
შეგახსენებთ, რომ საქართველოს ყოფილი პრეზიდენტი, მიხეილ სააკაშვილი უკრაინელმა სამართალდამცავებმა დღეს დააკავეს.