სახალხო დამცველ უჩა ნანუაშვილის განცხადებით, სასამართლო სისტემასა და სამართალდამცავი ორგანოების საქმიანობაში, შეიძლება ითქვას, ყველაზე მეტი დარღვევები დაფიქსირდა.
როგორც ომბუდსმენმა, სასტუმრო „რედისონში“ ანგარიშის პრეზენტაციაზე აღნიშნა, ბოლო პერიოდში ტენდენციის სახით ჩამოყალიბდა ის, რომ გაიზარდა საჩივრები პოლიციელების წინააღმდეგ.
„ჩვენ ვაჯამებთ მიმდინარე 2017 წელს, ჩვენ ვსაუბრობთ ფაქტებით და ფაქტები არის სამწუხარო. წლის განმავლობაში იყო არაერთი საქმე, სადაც სერიოზულ დარღვევებს ჰქონდა ადგილი და სამწუხაროდ, ჩვენ თუ შევადარებთ წინა წლებს, დავინახავთ, რომ ამ მხრივ მიმდინარე წელი იყო გამორჩეული. სწორედ ამ ნეგატიური დარღვევებით გაიზარდა გახმაურებული საქმეების რაოდენობა, რადგან სერიოზული დარღვევები იყო დაფიქსირებული. გამომდინარე აქედან, ყველა კონკრეტულ ფაქტს ვსწავლობთ და ვაჯამებეთ ზოგადად ტენდენციებს. სასამართლო სისტემა, სამართალდამცავი ორგანოების საქმიანობა, მე ვფიქრობ, იყო ყველაზე მთავარი საკითხები, სადაც შეიძლება ითქვას, რომ მეტი დარღვევები იყო დაფიქსირებული.
ეს არის ის რეალობა, რომლის წინაშეც ვდგავართ და სახალხო დამცველი ასეთ არაერთ ფაქტს სწავლობს. ანგარიშში ცალკე გამოყოფილია სასამართლო სისტემა, სადაც არის სერიოზული გამოწვევები, თუნდაც ეს კონკრეტულმა საქმეებმა აჩვენა. კერძოდ, დეკანოზ მამალაძის საქმემ აჩვენა, რომ აქ არის სისტემური პრობლემები, ის რომ პროცესი იყო დახურული და საზოგადოებრივი ინტერესი არ იყო დაკმაყოფილებული. რეალურად არ მოხდა საზოგადოების ინფორმირება ამ საქმის მიმდინარეობასთან დაკავშირებით, ესეც პრობლემა იყო. ასევე ის, რომ მიმდინარე წელს რეალურად ძალაში არ შევიდა საქმეების განაწილების ელექტრონული წესი სასამართლოებში, ესეც პრობლემა იყო და ამანაც ვფიქრობ, დაღი დაასვა მიმდინარე მოვლენებს. მთლიანობაში მთელი რიგი მიმართულებებით იყო უფრო მეტი ნეგატივი, ვიდრე პოზიტივი. იყო მხოლოდ რამდენიმე მიმართულება, სადაც მდგომარეობა პოზიტივისკენ შეიცვალა, კერძოდ, მოხდა ქალთა მიმართ და ოჯახში ძალადობის წინააღმდეგ ევროსაბჭოს კონვენციის რატიფიცირება, ასევე რამდენიმე კანონის მიღება, რომელიც სხვადასხვა საკითხებს ეხებოდა. ვფიქრობ, მიმდინარე წელი უფრო მეტად პრობლემური და გახმაურებული საქმეებით გამოირჩეოდა“, - განაცხადა ნანუაშვილმა.