ევროპარლამენტში ,,ევროპის სახალხო პარტიის“ პოლიტიკურ ასამბლეას ,,ევროპული საქართველოს“ წარმომადგენლებიც ესწრებიან. დავით ბაქრაძემ ამ შეხვედრის ფარგლებში კომენტარი გააკეთა ბრიუსელში დიმიტრი მედოევის ჩასვლასთან დაკავშირებითაც.
,,ევროპარლამენტში ყოველთვის მოიძებნება ერთი, ან ორი ცალკეული დეპუტატი, რომელიც რუსეთის ხელისუფლების დავალებით მზად იქნება, რომ ასეთი აქციები განახორციელოს. სწორედ იმიტომ ჰყავს საქართველოს ხელისუფლება, რომ არ დაუშვას ასეთი რამ. იმუშაოს ევროპარლამენტის ხელმძღვანელობასთან, პოლიტიკურ ჯგუფებთან, რომ ასეთ ფაქტებს არ ჰქონდეს ადგილი. რა თქმა უნდა ეს არის ცუდი საქართველოსთვის,’’- განაცხადა ,,ევროპული საქართველოს“ თავმჯდომარემ დავით ბაქრაძემ.
ოკუპირებული სამხრეთ ოსეთის ე.წ. საგარეო საქმეთა მინისტრი დღეს ევროპარლამენტში რუსულ ფორუმს ესწრებოდა. დიმიტრი მედოევი ბრიუსელში რუსულ ფორუმზე ევროპარლამენტის წევრმა, პრორუსული შეხედულებებით ცნობილმა ტატიანა ჟდანოკმა მიიწვია.
საოკუპაციო რეჟიმის წარმომადგენელი დიმიტრი მედოევი ამტკიცებს რომ ბრიუსელში ე.წ. სამხრეთ ოსეთის რესპუბლიკის პასპორტით ჩავიდა, რადგან მას სხვა სამგზავრო დოკუმენტი არ გააჩნია.
ფორუმზე, სადაც რუსეთისა და დასავლეთის დაპირისპირების საკითხებზე მსჯელობდნენ, ერთ-ერთი მთავარი სტუმარი რუსეთის სათათბიროს დეპუტატი, კონსტანტინე ზატული იყო. საოკუპაციო რეჟიმების ინტერესებს კი ევროპარლამენტის შენობაში, იტალიის პარლამენტი ყოფილი წევრი და ცხინვალი რეჟიმის ლობისტი ევროპაში ჯულიეტო კიეზა იცავდა.