"სამინისტროს უმთავრესი საზრუნავია, გავაძლიეროთ სამუშოები საიმისოდ, რომ მსგავსი ტრაგედია აღარ განმეორდეს", - ამის შესახებ განათლებისა და მეცნიერების მინისტრმა, მიხეილ ჩხენკელმა სპეციალურად გამართულ ბრიფინგზე განაცხადა.
მინისტრის განცხადებით, შესაბამის ორგანოები ყველაფერს აკეთებენ, რათა მოხდეს სიმართლის უსწრაფესად დადგენა.
"შეურიგებელი ბრძოლა უნდა გამოვუცხადოთ ძალადობას. ჩვენმა ძალისხმევამ მთელი ქვეყანა, უკლებლივ ყველა სკოლა უნდა მოიცვას. ეს ამოცანა ყველა სახელმწიფო უწყების, არასამთავრობო ორგანიზაციების, მედიის, მთლიანად საზოგადოების ყოველდღიურ შრომას და საერთაშორისო გამოცდილების გამოყენებას მოითხოვს. გუშინ შევხვდი შინაგან საქმეთა მინისტრს, ჩვენ ერთსულოვანი ვართ იმაში, რომ აუცილებელია დანაშაულის პრევენციის მიზნით, სამინისტროებს შორის თანამშრომლობის გაღრმავება. შევთანხმდით, რომ შეიქმნება უწყებათაშორისი სამუშაო ჯგუფი, რომელიც პრევენციის გეგმასა და პროცესს სრულ კოორდინაციას გაუწევს. ჯგუფის საქმიანობაში აქტიურად იქნებიან ჩართულნი იმ სახელმწიფო უწყებების, არასამთავრობო სექტორის, საერთაშორისო ორგანიზაციების წარმომადგენლები, რომლებიც არასრულწლოვანთა მართლმსაჯულების სფეროში მუშაობენ. უკვე დავასახელეთ რამდენიმე მიმართულებით მუშაობის სტრატეგია. პირველ რიგში, ეს არის საგანმანათლებლო დაწესებულებებში მანდატურის სამსახურის როლის გაძლიერება, ასევე, მანდატურის სამსახურისა და სამართალდამცავ უწყებებს შორის კოორდინირებული მოქმედება, ასევე გადაწყდა, რომ საწყის ეტაპზე, სკოლების უსაფრთხოების მონიტორინგში ჩაერთვება საპატრულო პოლიცია", - განაცხადა მინისტრმა.
მისივე თქმით, უწყებათაშორისი სამუშაო ჯგუფი იმუშავებს, არასრულწლოვნებისათვის ფსიქოლოგიური და საკონსულტაციო სერვისების უზრუნველყოფაზე.
"გააქტიურდება მუშაობა სკოლებში პრევენციული, საგანმანათლებლო, საინფორმაციო აქტივობები, საზოგადოებრივი წესრიგისა და სასკოლო დისციპლინის დაცვის, ბულინგისა და ძალადობის წინააღმდეგ. ჯგუფი ასევე იმუშავებს, არასრულწლოვნებისათვის ფსიქოლოგიური და საკონსულტაციო სერვისების უზრუნველყოფაზე, დაინერგება კონფლიქტების პრევენცია-მართვისა და მედიაციის პროგრამები. 24-საათიან რეჟიმში იმუშავებს ფსიქოლოგიური სამსახურის ცხელი ხაზი. ქვეყნის უკლებლივ ყველა სკოლა რომ მოვიცვათ, პროცესში პროფესიონალთა გარდა ჩართულები იქნებიან უმაღლესი სასწავლებლების ფსიქოლოგიის სპეციალობის მაგისტრანტები და დოქტორანტები.
საჭიროა, მშობლების აქტიური მონაწილეობა, ინტენსიური ჩართულობა სკოლის ცხოვრებაში და მათთვის საკონსულტაციო მომსახურების შეთავაზება.
ჩვენ არამხოლოდ პრევენციაზე უნდა ვიზრუნოთ, არამედ ისეთი ვითარების ფორმირებაზე, სადაც ძალადობა და აგრესია დაუშვებელია. მჯერა, რომ რაც არ უდნა რთულად გვეჩვენებოდეს, სწორედ ამ მიზნისკენ უნდა ვიმოძრაოთ, ეს კი მხოლოდ ცოდნის გავრცელებით, ღირებულებათა სწორი სისტემით, ჯანსაღი ცხოვრების წესის დამკვიდრებით მიიღწევა.
სამინისტრო გახსნილია საზოგადოებასთან თანამშრომლობისთვის, დღეს ვხვდები ფსიქოლოგებსა და ბავშვთა უფლებების ორგანიზაციების წარმომადგენლებს. ერთობლივი ძალისხმევით, აუცილებლად მივაღწევთ იმას, რომ უკლებლივ ყველა სკოლა მაქსიმალურად უსაფრთხო გახდეს. და მსგავსი ტრაგედია აღარასდროს განმეორდეს", აღნიშნა მინისტრმა.
