ქართველი ეპისკოპოსები ამერიკის შეერთებულ შტატებს საქართველოში რუსული პროპაგანდის წინააღმდეგ აქტიურობისკენ მოუწოდებენ.
”განვითარებისა და დემოკრატიის ცენტრის” აღმასრულებელი დირექტორის, ქეთევან ჩაჩავას თქმით, სინოდის წევრებმა ნამდვილად სთხოვეს, რომ რუსული პროპაგანდის წინააღმდეგ კიდევ უფრო აქტიურად ჩაერთოს აშშ და არა მხოლოდ ამერიკა, არამედ ჩვენი დასავლელი პარტნიორები.
„ნამდვილად სთხოვეს, რომ კიდევ უფრო აქტიურად ჩაერთოს აშშ და არა მხოლოდ ამერიკა, არამედ ჩვენი დასავლელი პარტნიორები. როდესაც საუბარია პროპაგანდაზე, რომელიც როგორც აღნიშნეს კვლავაც არ აღიქმება სათანადო პრობლემად და მნიშვნელოვანია, რომ ერთობლივი ძალებით მოხდეს გამკლავება, რადგან ასევე აღინიშნა, რომ ეკლესიის გამოყენებაც ხდება რუსული პროპაგანდის მიერ“, - განაცხადა ჩაჩავამ.
"რუსთავი 2"-ის ინფორმაციით, შეხვედრების შემდეგ საპატრიარქოს დელეგაციამ დაადასტურა, რომ ეკლესია მხარს უჭერს ქვეყნის ევროატლანტიკურ ინტეგრაციას და მიიჩნევს, რომ ტექნოლოგიურად განვითარებული დასავლური ქვეყნების პირობებში, რუსული პროპაგანდა არ უნდა მძლავრობდეს.
„ასე ვთქვი, რომ ალბათ მიზეზი უნდა ეძებონ თავის თავში, რომ რაღაც გამორჩათ, რაღაცას ვერ ითვალისწინებენ. იმიტომ, რომ წარმოუდგენელია ასეთ ტექნოლოგიური, განვითარებული და წინ წასული ამერიკა და ევროპა როგორ შეიძლება აგებდეს რუსეთთან, რომელიც ახლა იწყებს გამოსვლას. იმიტომ, რომ 90-იან წლებში ცხადია, მას ამის თავი არ ჰქონდა, არც შესაძლებლობა არ გააჩნდა და ბოლო 10-15 წელია რაც რუსეთი გამოვიდა მსოფლიო არენაზე. მიზეზი უნდა იპოვონ თავის თავში. უკეთესი პიარი, უკეთესი ინფორმირება, ინტერპრეტირება მოვლენების და ფართო გაშუქება“, - განაცხადა რუსთაველმა მიტროპოლიტმა მეუფე იოანემ.
