28 ნოემბერს თბილისის “Belt and Road” ფორუმში მონაწილეობის მიღების მიზნით საქართველოში ჩამოვიდა ჩინეთის სახალხო რესპუბლიკის ვაჭრობის მინისტრის მოადგილე ჩიან ქემინი.
ფორუმში მონაწილეობის გარდა, ჩინეთის კომერციის მინისტრის მოადგილე საქართველოს პირველ ვიცე-პრემიერს, ეკონომიკისა და მდგრადი განვითარების მინისტრს დიმიტრი ქუმსიშვილთან.
შეხვედრის დასრულების შემდეგ, გაიმართა საქართველოსა და ჩინეთის სახალხო რესპუბლიკას შორის ეკონომიკური ზონების განვითარებასა და სამეწარმეო სიმძლავრეების ხელშეწყობის სფეროში თანამშრომლის შესახებ ურთიერთგაგების მემორანდუმის ხელმოწერა.
ხსენებული მემორანდუმი მიზნად ისახავს ორმხრივი ეკონომიკური და სავაჭრო ურთიერთობების შემდგომ განვითარებას ვაჭრობის სფეროში თანამშრომლობის, ინვესტიციებისა და საწარმოო შესაძლებლობების გაუმჯობესების გზით, საწარმოებისათვის თანამშრომლობის პლატფორმის მშენებლობას და სამრეწველო კლასტერების გაძლიერებას.
საქართველოს მხარე და ჩინეთის მხარე წაახალისებენ და ხელს შეუწყობენ ჩინური საწარმოების მიერ საქართველოს ტერიტორიაზე ეკონომიკური ზონების მშენებლობას და თანამშრომლობას საწარმოო შესაძლებლობების სფეროში. ეკონომიკური ზონები მოიცავს ინდუსტრიულ ზონებს, ინდუსტრიულ პარკებს, ეკონომიკურ და ტექნოლოგიურ პარკებს, ინდუსტრიული კლასტერების პარკებს, სპეციალურ ეკონომიკურ ზონებსა და თავისუფალ ეკონომიკურ ზონებს.
მხარეები თანხმდებიან, რომ ეკონომიკურ ზონებში სამრეწველო შესაძლებლობების თანამშრომლობის ძირითადი სფეროები მოიცავს, თუმცა, არ არის შეზღუდული, შემდეგ მიმართულებებს: სამშენებლო მასალები, ელექტროენერგია, ქიმიკატები, ტექსტილი, ავტომექანიკა, კომუნიკაციები, სამანქანო დანადგარები, ხე-ტყე, სოფლის მეურნეობა, ტექნოლოგიური კვლევა და განვითარება, ვაჭრობის ლოგისტიკა და სხვა სფეროები, მხარეების შეთანხმებისამებრ.
ჩინეთის მხარე აქტიურად შეუწყობს ხელს ჩინური საწარმოების მიერ ეკონომიკური ზონების განვითარებას საქართველოში, საწარმოო შესაძლებლობის მიმართულებით თანამშრომლობას, გაუწევს სათანადო მხარდაჭერას ეკონომიკური ზონების მშენებლობას, ინვესტირებასა და ოპერირებას. ჩინეთის მხარე აცხადებს მზადყოფნას, გაუზიაროს საქართველოს მხარეს ჩინეთის წარმატებული გამოცდილება სპეციალური ეკონომიკური ზონებისა და ეკონომიკური და ტექნოლოგიური განვითარების ზონების შესახებ ჩინეთში და მხარი დაუჭიროს ქართველი პერსონალის სწავლებას.
