უკრაინის ინფრასტრუქტურის მინისტრის ვოლოდიმირ ომელიანის განმარტებით, ირლანდიურ «ლოუკოსტერ“ Ryanair-თან მოლაპარაკებებში პროგრესი შეინიშნება, თუმცა საკითხი ღია განხილვებიდან მოხსნილია.
„Ryanair-თან მოლაპარაკებები საჯარო განხილვის თემა აღარ არის, თუმცა მუშაობა მიმდინარეობს. და მე მჯერა, რომ Ryanair-ი უკრაინაშიო იფრენს", აცხადებს ვოლოდიმირ ომელიანი.
ომელიანმა ასევე განაცხადა, რომ უახლოეს წლებში უკრაინაში კიდევ რამდენიმე დაბალბიუჯეტიანი ავიაკომპანიის შესვლაა დაგეგმილი.
შეგახსენებთ, რომ 10 ივლისს Ryanair-მა განაცხადა, რომ უკრაინაში ოპერირების დაწყებაზე ბორისპოლის აეროპორტის ხელმძღვანელობასთან შეუთანხმებლობის გამო თქვა უარი.
თავის მხრივ აეროპორტის ხელმძღვანელის საქციელზე უკმაყოფილება დააფიქსირა უკრაინის ინფრასტრუქტურის მინისტრმა და სოციალურ ქსელში რიაბიკინის მისამართით ირონიული პოსტიც დატოვა. ამის შემდეგ მინისტრმა მთავრობის სხდომაზე აეროპორტის ხელმძღვანელის გადაყენებაც მოითხოვა. ქვეყნის პრეზიდენტმა და პრემიერმინისტრმა კი პაველ რიაბიკინს მოლაპარაკებების განსაახლებლად და ბოლომდე მისაყვანად გარკვეული დრო მისცეს.
