თბილისის საკრებულოში მეექვსე მოწვევის პირველი სხდომა გაიმართება. საქართველოს ორგანული კანონის „ადგილობრივი თვითმმართველობის კოდექსის“ შესაბამისად, ახალარჩეული საკრებულოს პირველ სხდომას საქართველოს ცენტრალური საარჩევნო კომისია არჩევნების საბოლოო შედეგების შეჯამებიდან 30 დღის ვადაში იწვევს.

კანონის მიხედვით, ახალარჩეული საკრებულოს პირველ სხდომას, საქართველოს ცენტრალური საარჩევნო კომისიის თავმჯდომარე გახსნის. შემდეგ კი, საკრებულოს ახალი თავმჯდომარის არჩევამდე მას მუნიციპალიტეტის საკრებულოს უხუცესი წევრი ფრიდონ ინჯია გაუძღვება.

საკრებულოს სხდომა დღეს 11:00 სააათზე გაიმართება. მას შემდეგ რაც, ახალი შემადგენლობის უფლებამოსილების ცნობა მოხდება, საკრებულოს თავმჯდომარეს და მის მოადგილეს დაამტკიცებენ, ამის შემდეგ კი კომისიების თავმჯდომარეებს აირჩევენ და ფრაქციებს დააკომპლექტებენ. 

11 ნოემბერს ქართული ოცნების პრესსამსახურმა იმ ადამიანების ვინაობა დააკონკრეტა, რომლებიც თბილისის ახლადარჩეული საკრებულოში კონკრეტულ თანამდებობებზე გამწესდებიან.

საკრებულოს თავმჯდომარის თანამდებობაზე წარდგენილია გიორგი ტყემალაძის კანდიდატურა; საკრებულოს პირველი მოადგილე გიორგი ახვლედიანი იქნება, ხოლო მოადგილეები მარიკა დარჩია და დავით უჯმაჯურიძე.

ფრაქცია „ქართული ოცნების“ თავმჯდომარის თანამდებობას დაიკავებს ბექა დავითულიანი, ხოლო მოადგილეების - ვახტანგ შაქარიშვილი, გიორგი მუსხელიშვილი და ჯაბა ჯიშკარიანი.

რაც შეეხება კომისიებს, მმართველი პოლიტიკური გუნდის ხედვით, აღნიშნული მიმართულებით, საკრებულოში დაგეგმილია რეორგანიზაცია, რასაც სტრუქტურული ცვლილებები მოჰყვება.

მეექვსე მოწვევის თბილისის საკრებულოში 50 წევრიდან 40 ქართულ ოცნებას, 5 წევრი ნაციონალებს, 3 ევროპულ საქართველოს, 2 კი პატრიოტთა ალიანს ეყოლება.

ახალი მოწვევის საკრებულოს თბილისის 2018 წლის ბიუჯეტის განხილვა მოუწევს, რომელიც საკრებულოში 15 ნოემბერს უნდა შევიდეს.