ორი საათის წინ ბორისპოლის აეროპორტში დააკავეს ჩემი 11 წლის შვილი და მასთან მყოფი საქართველოს სახელმწიფო დაცვის სამსახურის თანამშრომელი, - ამის შესახებ საქართველოს ყოფილმა პრეზიდენტმა მიხეილ სააკაშვილმა განაცხადა.
მისი ინფორმაციით, მათ ყველა საბუთი წესრიგში აქვთ, მაგრამ ორი საათია უკვე, რაც ცალკე ოთახში ჰყავთ გადაყვანილი.
„ორი საათის წინ ბორისპოლის აეროპორტში დააკავეს ჩემი 11 წლის შვილი და მასთან მყოფი საქართველოს სახელმწიფო დაცვის სამსახურის თანამშრომელი. სახელმწიფო დაცვის თანამშრომელი, რომელიც თან ახლდა ჩემს შვილს, ოფიციალურ მივლინებაში იმყოფება. მათ ყველა საბუთი წესრიგში აქვთ, მაგრამ ორი საათია უკვე, რაც ცალკე ოთახში ჰყავთ გადაყვანილი, მიზეზების ახსნის გარეშე. აეროპორტში მივდივარ, რათა გავარკვიო, თუ რა ხდება“, - აღნიშნავს მიხეილ სააკაშვილი.
სააკაშვილი Facebook-ზე გავრცელებულ ვიდეომიმართვაში ამბობს, რომ ის, რაც მის შვილს შეემთხვა, პოროშენკოს შვილს რომ შემთხვეოდა, არ მოეწონებოდა. ის ნიკოლოზ სააკაშვილის სწრაფად გადმოცემას ითხოვს. სააკაშვილი უკვე 1 საათზე მეტია ბორისპოლის აეროპორტში იმყოფება და შვილს ელოდება.
