„დაზარლებულად უარის თქმის თაობაზე წერილი გუშინ ჩაგვბარდა. ამ შემთხვევაში, პროკურატურამ მიიჩნია, რომ საკმარისი საფუძველი არ არის დაზარალებულის უფლებამონაცვლედ ცნობა მოხდეს, რადგან მთელი საგამოძიებო მოქმედებებია დაგეგმილი“, - განუცხადა „ჯი-ეიჩ-ენს“ საიას იურისტმა, ლევან ვეფხვაძემ, რომელიც პავლიაშვილის ოჯახის ინტერესებს იცავს.
ვეფხვაძის განმარტებით, პავლიაშვილის ოჯახის დაზარალებულად ცნობისთვის სავსებით საკმარისი საფუძველი არსებობს.
„ამ ყველაფერს პროკურატურა სხვაგვარად განმარტავს, ჩვენ სხვაგვარად. მთავარი ის არის, რომ პროკურტურა მტკიცებულებების გაცნობის და საქმეში აქტიურად ჩართვის უფლებას გვაძლევს“, - აცხადებს იურისტი.
როგორც ვეფხვაძე აღნიშნავს, ამ ეტაპზე არც მას და არც პავლიაშვილის ოჯaხს საგამოძიებო უწყებასთან კითხვები არ აქვს.
„ რა თქმა უნდა, საქმესთან დაკავშირებით, კითხვები გვაქვს, თუმცა, არა პროკურატურასთან. თუ პროკურატურა ეფექტურ გამოძიებას აღარ განაგრძობს, შესაბამისი რეაქცია გვექნება“, - აღნიშნავს უფლებადამცველი.
შეგახსენებთ, რომ 25 ოქტომბერს, 33 წლის პაატა პავლიაშვილი სამართალდამცავების მიერ მისი დაკავებისას, გარდაიცვალა. მომხდარზე პროკურატურამ გამოძიება საქართველოს სისხლის სამართლის კოდექსის 116-ე მუხლის პირველი ნაწილით დაიწყო, რაც სიცოცხლის გაუფრთხილებლობით მოსპობის შესაძლო ფაქტს გულისხმობს.
