”აბესაძეს სერიოზული ფსიქოლოგიური პრობლემა აქვს, ის ძალიან ცუდადაა. მხოლოდ მკურნალობით, მისი ჯანმრთელობის მდგომარეობის გამოსწორება გამორიცხულია”, - ამის შესახებ ”ჯი-ეიჩ-ენს” ოთარ აბესაძის ადვოკატმა, ნონა ფილაურმა განუცხადა.
მან მერიის ყოფლი მაღალჩინოსანი საპყრობილეში გუშინ, სასამართლოს შემდეგ მოინახულა.
”მიუხედავად იმისა, რომ აბესაძეს ყველაფერი უტარდება, რისი შესაძლებლობაც ჯანმრთელობის მდგომარეობის გაუმჯობესების მრხივ სასჯელაღსრულების დეპარტამენტს აქვს, ეს მისთვის საკმარისი არ არის. როცა მას მკურნალობის რაღაც კურსი უტარდება, ის კვლავ საკანს უბრუნდება, მას კი დახურული სივრცის შიში აქვს, შესაბამისად, დახურული სივრცის გამო დეპრესიული ფონი თავიდან ეწება. ფაქტობრივად გამოდის, რომ მკურნალობას არანაირი აზრი აქვს.
მას ძალიან სერიოზულ წამლებს ასმევენ, მისი ჯანმრთელობის მდგომარეობა დროის რაღაც პატარა მონაკვეთში უმჯობესდება, მერე ისევ უარესდება, დახურული სივრცე მისი ავადმყოფობის პროვოცირებას ახდენს”, - აცხადებს ფილაური.
ოთარ აბესაძე გუშინ სასამართლო პროცესზე ვერ გამოცხადდა, მან ამასთან დაკავშირებით სასამართლოში წერილი გაგზავნა.
”სასამართლოში წასვლის წინ ძალიან ცუდად გახდა, ჰაერის უკმარისობა ჰქონდა, აღქმა უჭირდა და ცნობიერების დაკარგვის შეეშინდა. იძულებული გახდა, განცხადება დაეწერა. ისე ცუდად იყო, არ იცოდა გზაში რა დაემართებოდა, გადაადგილება ვერ შეძლო”, - განაცხადა ადვოკატმა.
შეგახსენებთ, რომ ოთარ აბესაძე ქრთამის აღების ფაქტზე 12 ივლისს დააკავეს.
