საფრანგეთის საგრეო საქმეთა მინისტრმა, ბერნარ კუშნერმა რუსეთთან გაფორმებულ ექსვპუნქტიან ცეცხლის შეწყვეტის ხელშეკრულებაზე და რუსეთის მხრიდან მისი გარკვეული პუნქტების შეუსრულებლობაზე ისაუბრა. მისი თქმით, იმ პერიოდში მთავარი იყო შექმნილიყო დოკუმენტი, რომელიც რუსეთის ჯარებს შეაჩერებდა და ამ დოკუმენტის მომზადება საფრანგეთის პრეზიდენტმა ნიკოლა სარკოზიმ შეძლო. ამის შესახებ კუშნერმა "ევროპის სახლში" ისაუბრა, სადაც ოპოზიციის წარმომადგენლებთან, ექსპერტებთან, ჟურნალისტებთან და სხვადასხვა არასამთავრობო ორგანიზაციის წარმომადგენლებთან შეხვედრა გამართა.
მისი თქმით, საქართველოს გაუმართლა, რომ 2008 წლის ომის დროს ევროკავშირის თავმჯდომარე ქვეყნის, საფრანგეთის პრეზიდენტი ნიკოლა სარკოზი იყო, რადგან კუშნერის განცხადებით, "სარკოზი სწრაფი ბიჭია". მისივე თქმით, მიუხედავად იმისა, რომ 2008 წელს გაფორმებულ, ცეცხლის შეწყვეტის შესახებ ექსვსპუნქტიან დოკუმენტს რუსეთი სრულად არ ასრულებს, მომავალში სწორედ ამ დოკუმენტის ბაზაზე უნდა მოხდეს პრობლემის გადაწყვეტა. ამისათვის კი ფრანგი მინისტრის მტკიცებით, საჭიროა საზოგადოების მოთმინება და პოლიტიკოსების მუშაობა.
"გასაგებია, რომ პრობლემის გადაწყვეტა სწრაფად გსურთ, თუმცა ეს მალე ვერ მოხდება. ამისათვის საჭიროა ვიაროთ იმ გზით, რომლის მეშვეობითაც რუსეთი გააცნობიერებს, რომ მან საქართველოს ტერიტორია უნდა დატოვოს - ეს გზა კი არის დიალოგი", - განაცხადა კუშნერმა და დასძინა, რომ ომი საქართველოსა და რუსეთს შორის მოხდა და სწორედ ამ უკანასკნელებმა უნდა აწარმოონ დიალოგი, რაშიც მათ ევროკავშირი და სხვადასხვა არასამთავრობო და საერთაშორისო ორგანიზაციები დაეხმარებიან,
"პრობლემის გადაწყვეტისთვის საჭირო თქვენი, ხალხის მოთმინება და ჩვენი, პოლიტიკოსების მუშაობა", - განაცხადა კუშნერმა.
