27 ოქტომბერს, ევროკავშირისა და გერმანიის საერთაშორისო თანამშრომლობის საზოგადოების (GIZ) პროექტი - „მცირე და საშუალო მეწარმეობის განვითარება და DCFTA საქართველოში“ პირველი ოფიციალური ბიზნეს კლასტერის - ქართული ავეჯის კლასტერის პრეზენტაციას გამართავს. აღნიშნული კლასტერი გვისტოში დარეგისტრირდა. მისი დაფუძნება საქართველოში „ევროკავშირი ბიზნესისთვის“ ინიციატივის ფარგლებში მოხდა და დღეისათვის 25 ადგილობრივ ავეჯის მწარმოებელ საწარმოს აერთიანებს.
პრეზენტაციაზე მისასალმებელი სიტყვით წარსდგებიან საქართველოს ეკონომიკისა და მდგრადი განვითარების მინისტრის მოადგილე გიორგი ჩერქეზიშვილი, ევროკავშირის ელჩი საქართველოში იანოშ ჰერმანი და გერმანიის საერთაშორისო თანამშრომლობის საზოგადოების პროგრამის დირექტორი კატია კამერერი. აუდიტორიის წინაშე კლასტერის პრეზენტაციით წარსდგებიან ჯენოვევა ქრისტოვა (ბულგარეთის ავეჯის კლასტერი) და ბესიკ ვერძეული (ქართული ავეჯის კლასტერი).
ღონისძიების ფარგლებში გაიმართება ღვინის დეგუსტაცია ქართული ავეჯის კლასტერის ღვინის საპრეზენტაციო ავეჯის გამოყენებით და ფოტოგამოფენა.
პრეზენტაციას დაესწრებიან სამთავრობო უწყებების, ევროკავშირის წარმომადგენლობის, საერთაშორისო დონორი ორგანიზაციების წარმომადგენლები, ასევე, პროექტის პარტნიორები და ბენეფიციარები.
ქართული ავეჯის კლასტერის წევრები შეთანხმდნენ ერთობლივი პროდუქტი აწარმოონ, რათა წარმოების მასშტაბის გაზრდის გზით უკეთ ისარგებლონ საქართველოსა და ევროპის ბაზრებზე არსებული შესაძლებლობებით. კერძოდ, ისინი უზრუნველყოფენ საწარმოთა შესაძლებლობებისა და ორგანიზაციულ განვითარებას, შექმნიან კრეატიულ სივრცეს ახალგაზრდა დიზაინერებისთვის მათი დახელოვნებისა და პროფესიულ შეჯიბრებში მონაწილეობის წახალისებით და დაამყარებენ საერთაშორისო კავშირებს. პროექტი, თავის მხრივ, მხარს დაუჭერს კლასტერს ყველა ამ მიმართულებით.
