9 თვიანი ლოდინის შემდეგ, მსჯავრდებულ დეკანოზ გიორგი მამალაძეს ხვალ მეუფე დიმიტრი შიოლაშვილი და დეკანოზი რევაზ სიხარულიძე მოინახულებენ. აღნიშნულ ფაქტს „ჯი-ეიჩ-ენთან“ მამალაძის ადვოკატი, მიხეილ რამიშვილი პოზიტიურ ნაბიჯს უწოდებს.
„ეს ძალიან კარგი და პოზიტიური ნაბიჯია, რადგან მამა გიორგი მის სულიერ მოძღვართან შეხვედრას დიდი ხანი ხანი ელოდა. მოხარული ვარ, რომ გარკვეული შეფერხებების მიუხედავად, მეუფე დიმიტრი საპყრობილეში თავის სულიერ შვილს მოინახულობს. მოლოდინში ვიყავით, რომ ადრე თუ გვიან, მეუფე დიმიტრი მასთან შებრძანდებოდა, მაგრამ ზუსტი დრო არ ვიცოდით“, - განუცხადა „ჯი-ეიჩ-ენს“ მიხეილ რამიშვილმა.
ადვოკატისთვის უცნობია თუ თემაზე ისაუბრებენ სასულიერო პირები მსჯავრდებულ დეკანოზთან.
„ნამდვილად ვერ გეტყვით კონკრეტულად რა თემებზე ისაუბრებენ. თუმცა, ცხადაია რომ სულიერი მოძღვრი და სულიერი შვილი შეხვედრაზე ბევრ თემაზე ისაუბრებენ. ალბათ, აღსარება-ზიარების საკითხზეც იქნება საუბარი, თუმცა, კონკრეტულად ვერაფერს გეტყვით“, - განაცხადა რამიშვილმა.
როგორც ადვოკატი აღნიშნავს, ეს შეხვედრა სინოდის მიერ დეკანოზის საქმის შესწავლას არ უკავშირდება.
„ერთ-ერთმა მეუფემ ბრძანა, რომ კომისიის შექმნა, მისი წევრების დაკომპლექტება აპლეაციის და კასაციის დამთავრების შემდეგ მოხდება. ეს კი მოგეხსენებათ, გარკვეულ დროსთან, თვეებთანაა დაკავშირებული. კომისიის შექმნას რა ფორმით აპირებენ, ან რის გამოკვლევას აპირებენ, ეს მათი კომპეტენციის საქმეა“, აცხადებს რამიშვილი.
