პარლამენტის ვიცე-სპიკერის, გია ვოლსკის განცხადებით, უნდა მოიძებნოს სამართლებრივი გზა, რათა თიანეთის მერობის კანდიდატი თამაზ მეჭიაური და მისი ამომრჩევლები არჩევნების ობიექტურობაში დარწმუნდნენ.
მისივე თქმით, სადაც სამართალი არ არის, არ იქნება მშვიდობაც, ამიტომ ამ საკითხის განხილვაა საჭირო და იგნორირება კატეგორიულად არ შეიძლება.
„ოპოზიციას უფრო მეტი სიმპათიების მიღება შეუძლია, როდესაც თავის დაჩაგვრაზე საუბრობს. როცა გახსნეს ბიულეტენების ყუთი, აღმოჩნდა, რომ რამდენიმე გაუქმებული ბიულეტენი არ იმსახურებდა გაუქმებას და მასში „41“ იყო აღნიშნული. ამის გამო, სამი-ოთხი ხმით, თუ უფრო ნაკლებით ჩაითვალა, რომ ამ უბანზე მოიგო სახელისუფლებო წარმომადგენელმა.
მიუხედავად ამისა, სამართლებრივი გზა უნდა მოიძებნოს, რომ თავად თამაზ მეჭიაური და არა მარტო ის, მისი ამომრჩევლებიც დარწმუნდნენ ობიექტურობაში.
მე ვფიქრობ, რომ სადაც სამართალი არ არის, არ იქნება მშვიდობაც, ამიტომ ამ საკითხის განხილვაა საჭირო და იგნორირება კატეგორიულად არ შეიძლება“, - განაცხადა გია ვოლსკიმ.
შეგახსენებთ, ცესკო-ს წინასწარი მონაცემებით, გაუქმებული ბიულეტენების დათვლის შემდეგ, თამაზ მეჭიაურს ოთხი ხმით „ქართული ოცნების“ კანდიდატმა ლელა ქიტესაშვილმა მოუგო.
მეჭიაური აპირებს, რომ სამართლებრივად იბრძოლოს.
