ბათუმის მერის არჩევნებში „ქართული ოცნების“ კანდიდატი ლაშა კომახიძე ლიდერობს. ბათუმის საოლქო საარჩევნო კომისიაში ხმის დათვლის პროცესი დილის 06:00 საათზე დასრულდა. პირველადი მონაცემებით, მეორე ტური აღარ გაიმართება. ხმების 55,67% „ქართული ოცნების“ მერობის კანდიდატმა ლაშა კომახიძემ მოიპოვა, მეორე ადგილი ხმების 24,19 % „ერთიანი ნაციონალური მოძრაობის“ კანდიდატს ლევან ანთაძეს ერგო. 6,43 % მიიღო „ევროპული საქართველოს“ კანდიდატმა პეტრე ზამბახიძემ და 6,16 % „პატრიოტთა ალიანსის“ კანდიდატმა თენგიზ თავდგირიძემ. „ლეიბორისტული პარტიის კანდიდატმა ჯელალ ქიქავამ 3, 24 % მოიპოვა, დანარჩენმა ოთხმა კანდიდატმა კი ხმების 1%-ზე ნაკლები. ამდენად, ბათუმში მეორე ტური აღარ გაიმართება და პირველადი მონაცემებით, ბათუმის მერი ლაშა კომახიძე იქნება.
რაც შეეხება ბათუმის საკრებულოს, ბათუმის ათივე მაჟორიტარულ ოლქში „ქართული ოცნების“ დეპუტატობის კანდიდატებმა გაიმარჯვეს. პროპორციული სისტემით კი საკრებულოში ოთხი პარტია იქნება წარმოდგენილი.
ხმები ასე გადანაწილდა: ქართული ოცნება 54%; ნაციონალური მოძრაობა 25%; პატრიოტთა ალიანსი 7%; ევროპული საქაქრთველო 7%; ლეიბორიტული პარტია 3%; „დიმიტრი ლორთქიფანიძე, კახა კუკავა-თავისუფალი საქართველო“ 2%, რესპუბლიკური პარტია 1 %.
საერთო ჯამში ბათუმის 25-კაციან საკრებულოში 19 მანდატი „ქართულმა ოცნებამ“, 4 „ნაციონალურმა მოძრაობამ“, თითო მანდატი კი „ევროპულმა საქართველომ“ და პატრიოტთა ალიანსმა“ მოიპოვეს.
სულ ბათუმის მერობისთვის 9 კანდიდატი, საკრებულოს მანდატებისთვის კი 14 პოლიტიკური პარტია იბრძოდა.
მეორე ტური არ გაიმართება აჭარის არც ერთ მუნიციპალიტეტში. პირველადი მონაცემებით, პირველ ტურში, ხუთივე მუნიციპალიტეტში, „ქართული ოცნების“ მერობის კანდიდატებმა გაიმარჯვეს.
