Wizz Air-ი ქუთაისიდან კიდევ ერთ მიმართულებას ამატებს. ავიაკომპანია ქუთაისიდან საბერძნეთის დედაქალაქ ათენის მიმართულებით ფრენებს მაისიდან იწყებს. რეისები კვირაში ორი სიხშირით, ყოველ ხუთშაბათსა და კვირას განხორციელდება. ერთი მიმართულებით ფრენის ღირებულება 53.99 ლარიდან (19.99 ევროდან) იქნება.
Wizz Air-ი ათენის მიმართულებით პირველ რეისს 17 მაისს განახორციელებს. ავიაკომპანიის საიტზე ბილეთების შეძენა უკვე შესაძლებელია.
,,სიხარულით მინდა გაცნობოთ დღეიდან ქუთაისი-ათენის მიმართულებით ფრენის დაწყების შესახებ. ამ რეგიონის მიმართ ჩვენი განსაკუთრებული ინტერესიდან გამომდინარე, ვაგრძელებთ ნაყოფიერ თანამშრომლობას ქუთაისის საერთაშორისო აეროპორტთან და ვეცდებით საქართველოს მგზავრებს მოთხოვნის შესაბამისად კიდევ უფრო მრავალფეროვანი მიმართულებები შემოგთავაზოთ. ახლახანს დავამატეთ ფრენები პარიზის, რომის, პრაღის და ბარსელონას მიმართულებით.ჩვენი ეკიპაჟის გამოცდილი წევრები მოუთმენლად ელოდებიან ვიზეარის ყოველ მგზავრს, რათა ღიმილით შეეგებონ მათ ჩვენი ახალი ავიაპარკის საჰაერო ხომალდებზე”, აცხადებს ავიაკომპანიის კომუნიკაციების მენეჯერი სორინა რაცი.
ათენი შესანიშნავი ადგილია, როგორც გრძელვადიანი დასვენებისთვის, ასევე კვირის ბოლოს ხანმოკლე განტვირთვისთვის. იგი ვიზიტორებს სთავაზობს გასართობი და სანახაობრივი აქტივობების ფართო არჩევანს. ევროპის ეს შესანიშნავი ისტორიული დედაქალაქი ცნობილია თავისი მდიდარი კულტურული მემკვიდრეობით. ამავდროულად, ის გამოირჩევა თანამედროვე ქალაქისთვის დამახასიათებელი რიტმით, რომელიც მთელი წლის განმავლობაში იზიდავს ტურისტებს.
როგორც ცნობილია, ავიაკომპანია საბერძნეთში, კერძოდ სალონიკის მიმართულებით უკვე ოპერირებს.
შეგახსენებთ, რომ Wizz Air-მა ქუთაისის საერთაშორისო აეროპორტიდან უკვე დაანონსა ფრენები ბარსელონას, პრაღის, რომის და პარიზის მიმართულებით.
Wizz Air Hungary Ltd უნგრული დაბალ ბიუჯეტიანი ავიაკომპანიაა, სათაო ოფისი მდებარეობს ბუდაპეშტში Liszt Ferenc-ის საერთაშორისო აეროპორტში. ავიაკომპანია დაბალი ფასის მისაღწევად ძირითადად იყენებს სხვადასხვა ქალაქების პატარა აეროპოპორტებს, იგი დაფრინავს ევროპაში ისრაელში არაბეთის გაერთიანებულ საემიროებში და სხვა. ავიაკომპანიას გააჩნია ყველაზე დიდი ფლოტი უნგრულ ბაზარზე, თუმცა ის არ არის ნაციონალური ავიახაზები, ამჟამად ოპერირებს მსოფლიოს 35 ქვეყანაში. ავიაკომპანია შესულია ლონდონის საფონდო ბირჟაზე FTSE 250 Index.
