"ნაციონალური მოძრაობის წევრებმა” და მათმა მხარდამჭერებმა ბიძინა ივანიშვილის რეზიდენციის ჭიშკარს მიაკრეს პლაკატები, რომლებზეც გამოსახულია ბიძინა ივანიშვილი და მიწერილია ”ფაროსანა”.
როგორც მერობის კანდიდატმა ზაალ უდუმაშვილმა განაცხადა, ყველანაირი უკანონობა 21 ოქტომბერს დასრულდება.
„აქ ცხოვრობს ამ ქვეყნის მთავარი ფაროსანა, რომელიც შემოსულია მთელ საქართველოზე და იტაცებს და იტაცებს ქართულ მიწებს და ტერიტორიებს.
ის, რაც მოხდა თბილისში, ბათუმში, ერთდროულად პრაქტიკულად, ეს იყო ტერიტორიების მიტაცება. ალბათ, ძალიან გაგვიჭირდება ყველა იმ მიწის და ნაგებობის მოძიება, რომელიც დღეს ბიძინა ივანიშვილს ეკუთვნის, თუმცა აუცილებლად მოვიძიებთ.
სხვადასხვა კომპანიებსა თუ ფირმებზე აქვს გადაფორმებული, თუმცა ხედავთ, რომ მიმდინარეობს მცოცავი მიტაცება როგორც თბილისის, ასევე საქართველოს ტერიტორიების. თბილისი არ დაუშვებს, რომ მისი ისტორიული ნაწილი მიიტაცოს ამ ადამიანმა, რომლის სახლი პირამდე სავსეა ამ ქვეყნის მოქალაქეების ფულით.
ეს არის ადამიანი, რომელიც ყველაფერზე მიდის, ოღონდ კი საკუთარი კომპანიები და საკუთარი თავი გაამდიდროს და ეს ხდება ჩვენს ხარჯზე,“ - განაცხადა ზაალ უდუმაშვილმა.
ცნობისთვის, ენმ-ის წევრებმა და მხარდამჭერებმა აქცია რუსთაველის მეტროდან დაიწყეს და ბიძინა ივანიშვილის რეზიდენციისაკენ გადაინაცვლეს.
მათი განცხადებით, პუშკინის სკვერისა და თაბორის მთის მიმდებარე ტერიტორიის ყოფილი პრემიერ-მინისტრის, ბიძინა ივანიშვილის კუთვნილი კომპანიისთვის გადაცემას აპროტესტებდნენ.
