თუ აქამდე და სხვა შემთხვევებში მოტივირებულ შენიშვნებს ვწერდით, ძირითადში, ჩვენი შეხედულებებიდან გამომდინარე, კონსტიტუციასთან მიმართებაში გადაწყდა, რომ ამოსავალი ყოფილიყო ის მთავარი, რის თაობაზეც ამ ერთი წლის განმავლობაში მუდმივად ვსაუბრობდი მეც და მთელი ქართული საზოგადოებაც, - ამის შესახებ დღეს გამართულ ბრიფინგზე საქართველოს პრეზიდენტმა, გიორგი მარგველაშვილმა განაცხადა.
მისი თქმით, ეს არის შეთანხმება, კონსენსუსი და სწორედ შეთანხმებისა და კონსენსუსის სულისკვეთებით დაიწერა მოტივირებული შენიშვნები.
"დღეს მე გადავაგზავნი საქართველოს პარლამენტში მოტივირებულ შენიშვნებს კონსტიტუციასთან დაკავშირებით. მოტივირებული შენიშვნები არსებულ შემთხვევაში განსაკუთრებულად დაიწერა. თუ აქამდე და სხვა შემთხვევებში მოტივირებულ შენიშვნებს ვწერდით, ძირითადში, ჩვენი შეხედულებებიდან გამომდინარე, კონსტიტუციასთან მიმართებაში გადაწყდა, რომ ამოსავალი ყოფილიყო ის მთავარი, რის თაობაზეც ამ ერთი წლის განმავლობაში მუდმივად ვსაუბრობდი მეც და მთელი ქართული საზოგადოებაც. ეს არის შეთანხმება, კონსენსუსი და სწორედ შეთანხმებისა და კონსენსუსის სულისკვეთებით დაიწერა მოტივირებული შენიშვნები", - განაცხადა პრეზიდენტმა.
პრეზიდენტის თქმით, მოტივირებულ შენიშვნებში 2020 წელს, პროპორციულ საარჩევნო სისტემაზე გადასვლის საკითხიც შევიდა. მისივე თქმით, მოტივირებულ შენიშვნებში პირველი ოთხი საკითხი არის თავიდან ბოლომდე მმართველი პარტიის, ”ქართული ოცნების” საკითხები. ის საკითხები, რომელიც ”ქართულმა ოცნებამ” ვალდებულებით აიღო ჩასასწორებლად ვენეციის კომისიასთან.
"ეს 4 საკითხი უცვლელად გადმოდის მოტივირებულ შენიშვნებში. ეს არის ბონუსის, ბლოკების, საკონსტიტუციო სასამართლოსა და აღმსარებლობის თავისუფლების საკითხები. მეხუთე საკითხიც ეკუთვნის ”ქართულ ოცნებას”. ეს საკითხია, რომელსაც საზოგადოებას ვესაუბრობოდით, თუნდაც საკონსტიტუციო განხილვების დროს, იმ პერიოდში, როდესაც გვქონდა შესაძლებლობა საქართველოს სხვადასხვა კუთხეში გვესაუბრა კონსტიტუციის პროექტთან დაკავშირებით. ეს არის 2020 წელს პროპორციული არჩევნების დანიშვნის საკითხი”, - აღნიშნა პრეზიდენტმა.
ცნობისთვის, პრეზიდენტმა საკონსტიტუციო ცვლილებების პროექტის ექვს პუნქტს ვეტო დაადო.
