საქართველოს პარლამენტში 2018 წლის სახელმწიფო ბიუჯეტის პროექტის განხილვა დაიწყო. პირველადი ვარიანტის თანახმად, 2017 წელთან შედარებით, 2018 წლის სახელმწიფო ბიუჯეტი დაახლოებით 949 მილიონი ლარით გაიზრდება და 12 მილიარდ 364 მილიონ 500 ათასი ლარი იქნება.
ბიუჯეტის პროექტის მიხედვით, მომავალი წლისთვის მშპ-ს რეალური ზრდა 4,5%, ხოლო დეფლატორის პროგნოზი 3,5%-ია. ამავე დოკუმენტის თანახმად, საშუალოვადიან პერიოდში ეკონომიკის რეალური ზრდის პროგნოზი 5%-ის ფარგლებშია. 2018 წელს, 2017 წლის მსგავსად, ყველაზე მეტ დაფინანსებას მიიღებენ შრომის, ჯანმრთელობისა და სოციალური დაცვის, რეგიონული განვითარებისა და ინფრასტრუქტურის და განათლებისა და მეცნიერების სამინისტროები.
საპარლამენტო კომიტეტები მომავალი წლის სახელმწიფო ბიუჯეტის პროექტის პირველად ვარიანტს 9, 10 და 11 ოქტომბერს განიხილავენ. 12 ოქტომბერს ბიუჯეტის პროექტზე იმსჯელებენ საპარლამენტო ფრაქციები, „ნაციონალური მოძრაობა“ და „საქართველოს პატრიოტები“ და საპარლამენტო უმცირესობა და უმრავლესობა.
