დღეს დილით, დეკანოზ გიორგი მამალაძის ძმას, მალხაზ მამალაძეს სახლში უცნობი მამაკაცი მიეჭრა და ფული მოსთხოვა. ამის შესახებ „ჯი-ეიჩ-ენს“ მახლაზ მამალაძის ძმამ, თორნიკე მამალაძემ განუცხადა.
„ჩემი ძმა სახლში მარტო იყო, დილით, 6-ის ნახევარზე კარზე დაუკაკუნეს. კარი რომ გააღო, შავებში ჩაცმული, შავი ხელთათმანით, „კაპიშონით“ წვერებიანი მამაკაცი დახვდა, რომელმაც ჰკითხა, მამა გიორგის ძმა იყო თუ არა. ამის შემდეგ პირდაპირ ეძგერა და ფული მოსთხოვა. ფული არ მაქვსო, უთხრა ჩემმა ძმამ, ხელი ჰკრა და სახლიდან გამოიქცა. ამის შემდეგ მან პოლიციაში დარეკა“, - აცხადებს თორნიკე მამალაძე.
ის მომხდარ ფაქტს ოჯახის დაშინებას უკავშირებს.
„ეს ყაჩაღობა რომ იყოს, ის ადამიანი იარაღით უნდა მისულიყო, ქურდობის შემთხვევაში კი, კარზე არ დააკაკუნებდა. ეს ფაქტი პირდაპირ იმისკენაა მიმართული, რომ შევშინდეთ და ბრძოლა შევწყვიტოთ. მოგეხესენებათ, დახურული სხდომებიდან ჩვენებების გავრცელებაზე ადვოკატებიც პროკურატურაში იყვნენ დაბარებულები.
ამ ფაქტამდე კომენტარები იწერებოდა, რომ მამა გიორგის უკანანო დაკავებას უნდა შევგუებოდით“, - აცხადებს მამალაძე.
მალხაზ მამალაძე ამ წუთებში ბათუმის მთავარ სამმართველოში იმყოფება.
„ჩემი ძმა ბათუმის მთავარ სამმართველოში იმყოფება, სამმართველოს უფროსთანაა გასაუბრებაზე. როგორც მალხაზი ამბობს, მას იმ ადამიანის ამოცნობა შეუძლია, ეს კი უახლოეს წუთებში უნდა მოხდეს. თუ ეს პროცესი გაიწელება, ადამიანური მომენტია, რომ მან მისი ამოცნობა ვეღარ მოახერხოს“, - განაცხადა მამალაძემ.
