სამწუხაროა ის, რომ თბილისის არც ერთ ხელისუფლებას აზრად არ მოსვლია, რომ თქვენთვის განსაკუთარებული და სპეციალური სამსახური შეექმნა, რომელიც იზრუნებდა დევნილთა პრობლემების მოგვარებაზე, სწორედ ეს არის ერთ-ერთი მთავარი ინიციატივა, რომელიც აუცილებლად განხორციელდება ოქტომბრის შემდეგ, - ამის შესახებ „ნაციონალური მოძრაობის“ თბილისის მერობის კანდიდატმა ზაალ უდუმაშვილმა წყნეთში, დევნილებთან შეხვედრაზე განაცხადა.
მისი თქმით, დევნილთა პრობლემების მოსაგვარებლად თბილისის მერია სპეციალურ სამსახურს შექმნის და თბილისის ბიუჯეტში გაჩნდება მუხლი, რომელიც ყოველწლიურად განსაზღვრავს 10 მილიონ ლარს დევნილთა საყოფაცხოვრებო პირობების გაუმჯობესებისთვის. მისივე თქმით, ამ სამსახურს სჭირდება ხელმძღვანელი, რომელიც თავად გაუწევს კონტროლს ამ პროცესს.
„მე დარწმუნებული ვარ, რომ არც ისე შორეულ მომავალში ჩვენ უკვე ერთმანეთს სოხუმში შევხვდებით, სოხუმში ავირჩევთ სოხუმის პირველ არჩეულ მერს და ერთად ვიზეიმებთ ამ ღირსშესანიშნავს თარიღს. თბილისში დაახლოებით, 100 000 დევნილი ცხოვრობს, როგორც აფხაზეთიდან, ასევე სამაჩაბლოდან. ეს რაც ოფიციალურადაა რეგისტირებული, თუმცა მათი რაოდენობა გაცილებით მეტია, რადგან არარეგისტრირებული დევნილებიც ძალიან ბევრია თბილისში. მინდა გითხრათ, რომ თქვენ ხართ ამ ქალაქის უმნიშვნელოვანესი და მართლაც საამაყო ნაწილი, თქვენ ხართ გამორჩეული თქვენი თავდადებით, თქვენი ნიჭიერებით და თქვენი შრომისმოყვარეობით. ამ წლების განმავლობაში თქვენ ყოველდღიურად ამტკიცებთ ერთგულებას ამ ქალაქის მიმართ. სამწუხაროდ, ვერც ეს ქალაქი და ვერც ეს ხელისუფლება ვერ გპასუხობთ იმავეთი“, - განაცხადა ზაალ უდუმაშვილმა.
