ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე სოფო კილაძე და პარლამენტის აპარატის უფროსი ნიკოლოზ ნათენაძე დღეს გერმანიის მთავრობის ეროვნული უმცირესობების კომისარს, ჰარტმუტ კოსჩიკს, გერმანიის შინაგან საქმეთა სამინისტროს წარმომადგენელს, დოქტორ ალექსანდერ შუმახერს და პარლამენტის წევრს, სტეფან მაიერს შეხვდნენ.
შეხვედრის ძირითად თემას ეთნიკური უმცირესობები წარმოადგენდა. „ჩვენს გერმანელ კოლეგებთან ვისაუბრეთ საქართველოში მცხოვრებ გერმანულ უმცირესობასთან დაკავშირებით და, ასევე, ქართველების წარმომადგენლობის თაობაზე გერმანიაში. შეხვედრაზე ხაზი გაესვა ორმხრივი ურთიერთობების მნიშვნელობას ჩვენი ერების დაახლოების პროცესში", - განაცხადა სოფო კილაძემ.
მისი თქმით, როგორც გერმანიის, ასევე საქართველოს ხელისუფლება ყველაფერს აკეთებს ამ ურთიერთობების გასაძლიერებლად. „ჩვენ, ქართული სახელმწიფო, რა თქმა უნდა, ყველანაირად გვერდით დავუდგებით გერმანულ უმცირესობას, მაქსიმალურად შევეცდებით, რომ ამ ადამიანებმა ჩვენს ქვეყანაში თავი კარგად, კომფორტულად და დაცულად იგრძნონ." - აღნიშნა სოფო კილაძემ.
კომიტეტის თავმდჯომარის ინფორმაციით, დღესვე, მხარეებმა ურთიერთთანამშრომლობის სამომავლო გეგმები დასახეს. „ეს პირველი შეხვედრა იქნება დასაწყისი იმ დიდი ურთიერთობებისა, რომელსაც მომავალში ამ კუთხით ვაპირებთ",- განაცხადა სოფო კილაძემ.
