კონკურენცია სახელმწიფო შესყიდვებში – ტენდერებში შეთანხმებული მონაწილეობის შემთხვევების დადგენა - ამ თემაზე საქართველოს კონკურენციის სააგენტოს თავმჯდომარე ნოდარ ხადურმა დღეს სემინარი გახსნა. სააგენტოს თავმჯდომარემ მოწვეულ ექსპერტებს და კონკურენციის სააგენტოს მხარდამჭერი პროექტის ხელმძღვანელებს, საქართველოში კონკურენციის სფეროს განვითარებასა და გაძლიერებაში წვლილის შეტანისთვის მადლობა გადაუხადა.
"საკითხები, რომლებზეც ვმსჯელობთ - კონკურენციის კანონის აღსრულება, სახელმწიფო შესყიდვები, ტენდერებში შეთანხმებული მონაწილეობის შემთხვევების გამოვლენისა და პრევენციული ღონისძიებების გაუმჯობესების გზები და სახელმწიფო შესყიდვების მონაწილეთათვის დაწესებული ბარიერების მინიმუმამდე დაყვანა, ძალიან მნიშვნელოვანია. შესაბამისად, ჩვენ ძალიან ვაფასებთ ყველა მხარის მოსაზრებას, შენიშვნას და აქტიურ ჩართულობას, რაც ხელს უწყობს საუკეთესო საერთაშორისო პრაქტიკის გაანალიზებასა და გაზიარებას“, - განაცხადა ნოდარ ხადურმა სემინარის გახსნაზე.
სემინარში, რომელიც ევროკავშირის პროექტის „საქართველოს კონკურენციის სააგენტოს მხარდაჭერა“ ფარგლებში გაიმართა, საქართველოს სახელმწიფო უწყებების წარმომადგენლები მონაწილეობდნენ.
