ანდორაში ეუთოს საპარლამენტო ასამბლეის საშემოდგომო სესიის ფარგლებში საქართველოს მუდმივმოქმედი დელეგაციის ხელმძღვანელი ორმხრივ შეხვედრებს მართავს. გერმანიის დელეგაციის ხელმძღვანელთან, დორის ბარნეტთან გამართულ შეხვედრაზე სოფიო ქაცარავამ ხაზი გაუსვა პრემიერ მინისტრის ვიზიტს გერმანიაში არჩევნებიდან სამი დღის შემდეგ, რაც გერმანიის მხრიდან საქართველოს მიმართ მჭიდრო თანამშრომლობაზე მეტყველებს.
შეხვედრაზე მხარეებმა საქართველოს დელეგაციის ხელმძღვანელის მიერ ორგანიზებული ღონისძიების თემები - ქვეყანაში გატარებული და მიმდინარე რეფორმები, ადამიანის ფუნდამენტური უფლებები და უსაფრთხოების საკითხები, კონფლიქტის მშვიდობიანი მოგვარების გზები და საერთაშორისო პარტნიორობის მნიშვნელობა განიხილეს.
სოფიო ქაცარავამ განსაკუთრებული ყურადღება აღმოსავლეთ პარტნიორობის მნიშვნელობასა და პრიორიტეტებზე გაამახვილა.
შეხვედრაზე ასევე ისაუბრეს დორის ბარნეტის სამომავალო ვიზიტზე თბილისში.
„გერმანიის დელეგაციასთან შეხვედრა ჩემთვის ყოველთვის სასიხარულოა. შეხვედრაზე ვისაუბრეთ საქართველოს საგარეო კურსსა და კონფლიქტის მოგვარების ხედვაზე და ამ მიმართულებით ევროკავშირის ქვეყნების მხარდაჭერის შესახებ. ასევე ოკუპირებულ რეგიონებში ადამიანის უფლებების თაობაზე და საერთაშორისო ორგანიზაციების დაშვების შესახებ" - განაცხადა სოფიო ქაცარავამ.
