"ნაციონალური მოძრაობა” საპროტესტო რეჟიმში გადადის, - ამის შესახებ პარტიის თბილისის მერობის კანდიდატმა ზაალ უდუმაშვილმა საგანგებო ბრიფინგზე განაცხადა.
მისი თქმით, პარტია ვერ დაიცდის 21 ოქტომბრამდე და ყოველდღიურად იბრძოლებს, რათა თბილისმა დაიბრუნოს თავისი ტერიტორიები და არ მოხდეს მისი გაჩუქება ბიძინა ივანიშვილზე.
”დღეს მთელმა საზოგადოებამ თავისი თვალით ნახა თუ რას პასუხობს ”ქართული ოცნების” ხელისუფლება თბილისელებს. ისევ პოლიცია, ისევ ზონდერჯგუფები, ისევ სუსი და ანგარიშსწორება თბილისელებზე. ჩვენი მოთხოვნა უცვლელია, უარი თქვას მერიამ იმ გადაწყვეტილების აღრსრულებაზე, რომელიც პუშკინის სკვერის და ბოტანიკური ბაღის მიმდებარე ტერიტორიის გასხვისებას და გაჩუქებას გულისხმობს. ჩვენი 6 თანამებრძოლი არის დაკავებული, მათგან ორი, გიორგი რუხაია და ლაშა ჭიღლაძე პირდაპირ საავადმყოფოში გადაიყვანეს იმის გამო, რომ მათ დაკავების შემდეგ ფიზიკურად გაუსწორდნენ სამართალდამცველები. ”ნაციონალური მოძრობა“ გადადის საპროტესტო რეჟიმზე, რაც იმას ნიშნავს, რომ ჩვენ გამოვიყენებთ კანონით არსებულ ყველა მეთოდს, რომ ამ გადაწყვეტილების აღსრულება არ მოხდეს. ვერ დავიცდით 21 ოქტომბრამდე და ყოველდღიურად ვიბრძოლებთ, რათა თბილისმა დაიბრუნოს თავისი ტერიტორიები და არ მოხდეს მისი გაჩუქება ბიძინა ივანიშვილზე”, - განაცხადა ზაალ უდუმაშვილმა.
