საქართველოს ფეხბურთის ფედერაცია კლუბ "ზუგდიდის" მეკარის, შოთა მამინაშვილის გარდაცვალების გამო მწუხარებას გამოთქვამს და დაღუპულის ოჯახის წევრებს თანაგრძნობას უცხადებს.
"1 ოქტომბერს, მცხეთა პარკზე გასამართი ეროვნული ლიგა 2-ის შეხვედრა ვიტ ჯორჯიასა და ზუგდიდს შორის, მატჩის დაწყებამდე მომხდარი ტრაგიკული შემთხვევის გამო გადაიდო. თამაშის დაწყებამდე შეუძლოდ გახდა ზუგდიდელთა მეკარე, შოთა მამინაშვილი, რომელიც გუნდის ექიმისა და სასწრაფო დახმარების გადაწყვეტილებით, დაუყოვნებლივ კლინიკაში გადაიყვანეს, თუმცა, სამწუხაროდ, მისი გადარჩენა ვერ მოხერხდა.
საქართველოს ფეხბურთის ფედერაცია ღრმა მწუხარებას გამოთქვამს შოთა მამინაშვილის დაღუპვის გამო და გულითადად თანაუგრძნობს დაღუპულის ოჯახის წევრებს, ახლობლებსა და მეგობრებს, საფეხბურთო კლუბ ზუგდიდსა და მის გულშემატკივრებს",- ნათქვამია განცხადებაში.
შეგახსენებთ, მცხეთაში „ვიტ-ჯორჯია“ -“ზუგდიდს“ მატჩის დაწყების წინ, საფეხბურთო კლუბ „ზუგდიდის“ მეკარე, შოთა მამინაშვილი მოთელვის დროს გარდაიცვალა.
„მცხეთა პარკზე“ თამაშის დაწყებამდე, ფეხბურთელმა გონება დაკარგა, ის საავადმყოფოში, სავარაუდოდ, გულის შეტევით გადაიყვანეს, თუმცა მისი გადარჩენა ვერ მოხერხდა.
31 წლის შოთა მამინაშვილი "ზუგდიდში“ 2017 წლიდან თამაშობდა.
