ლიბიაში დაკავებული ქართველი მეზღვაურების ოჯახის წევრებმა ბათუმში საპროტესტო აქცია გამართეს.
ისინი დახმარებას სახელმწიფოს სთხოვენ და აცხადებსენ, რომ მეზღვაურები ლიბიის საპატიმროში უმძიმეს პირობებში იმყოფებიან, არ აქვთ საკმარისი საკვები და წყალი.
„მთავრობას ვთხოვთ, ყურადღება მოგვაქციოს, როგორმე დაკავებულებს დაუკავშირდნენ. მეზღვაურებმა მთხოვეს, რომ ვიღაც არაბის ანგარიშზე თანხა ჩავურიცხოთ, რათა წყალი იყიდონ. საგარეო საქმეთა სამინისტრო არ რეაგირებს. რადგან ხელისუფლება ამ საკითხით არ დაინტერესდა, აქციას ვმართავთ. ლიბიაში მყოფ ქართველ მეზღვაურებს მხოლოდ საზღვრის უკანონო გადაკვეთას ედავებიან“,- აცხადებს ერთ-ერთი დაკავებულის და.
ლიბიაში, ტანზანიის დროში ქვეშ მცურავი თურქული გემი 30 აგვისტოს დააკავეს.
დაკავებული მეზღვაურებიდან სამი ქართველია.
მეზღვაურები წინასწარ პატიმრობაში იმყოფებიან.
საქართველოს საგარეო საქმეთა სამინისტროს საკონსულო დეპარტამენტის საინფორმაციო-საკონსულტაციო სამმართველოს უფროსის, გრიგოლ მაგრაქველიძის განცხადებით, ლიბიაში დაკავებულ ქართველ მეზღვაურებს ბრალი კონტრაბანდაში ედებათ.
მისივე განმარტებით, მიუხედავად არსებული სირთულეებისა, ქართული მხარე იყენებს მის ხელთ არსებულ ყველა შესაძლებლობას ჩვენი თანამოქალაქეებისთვის დახმარების აღმოჩენის მიზნით.
„ტანზანიის დროშის ქვეშ მცურავი გემის, REX-ის დაკავების შესახებ ინფორმაცია საქართველოს საგარეო საქმეთა სამინისტროს საკონსულო დეპარტამენტს ეცნობა სსიპ საზღვაო ტრანსპორტის სააგენტოს მიერ გემზე იმყოფებოდა ეკიპაჟის 11 წევრი, მათ შორის სამი საქართველოს მოქალაქე. გემი გადაყვანილია ტრიპოლის პორტში. ამჟამად, მეზღვაურები იმყოფებიან ქალაქ ტაჟურას დამანის ციხეში (Dhaman Prison in Tajura). მათ ბრალი ედებათ კონტრაბანდის მუხლით. საქმეს იძიებს ლიბიის პროკურატურა. მეზღვაურების საკითხთან დაკავშირებით მუშაობა მიმდინარეობს, ეგვიპტის არაბთა რესპუბლიკაში საქართველოს საელჩოს (რომელიც აკრედიტებულია ასევე, ლიბიაში) მეშვეობით.
ლიბიაში არსებული შიდა კონფლიქტის, დაძაბულობის და ადგილზე საქართველოს რეზიდენტი საელჩოს საკონსულოს არ არსებობის პირობებში ქართული მხარის ხელთ არსებული საკონსულო დაცვის ბერკეტები საკმაოდ შეზღუდულია.
მიუხედავად არსებული სირთულეებისა, ქართული მხარე იყენებს მის ხელთ არსებულ ყველა შესაძლებლობას ჩვენი თანამოქალაქეებისთვის დახმარების აღმოჩენის მიზნით. კერძოდ, ჩვენი თხოვნით მაქსიმალურად გვეხმარებიან ჩვენი უცხოელი პარტნიორები, სახელდობრ, ლიბიაში უნგრეთის დიპლომატიური წარმომადგენლობა. ასევე, ვინაიდან ხომალდის ეკიპაჟის 11 წევრიდან 5 თურქეთის მოქალაქეა, თურქეთის რესპუბლიკაში საქართველოს საელჩოც მუშაობს თურქულ მხარესთან, მათი პოზიციის გარკვევასა და დაგეგმილი ღონისძიებების შესახებ ინფორმაციის მოპოვებაზე. ამჟამად მიმდინარეობს განხილვა საქართველოს დაკავებული მოქალაქეებისათვის სამართლებრივი დახმარების აღმოჩენის ოპტიმალური გზების განსაზღვრის მიზნით“, - განაცხადა გრიგოლ მაგრაქველიძემ.
