თურქეთის კულტურისა და ტურიზმის სამინისტრო საკრუიზო ტურიზმის განვითარებისთვის აქტიურდება. აღნიშნულის მიზეზი კი არის ის, რომ ბოლო 2 წლის განმავლობაში ქვეყანას საკრუიზო ტურიზმი ფაქტობრივად 3-ჯერ შეუმცირდა.
სწორედ საკრუიზო ტურიზმის განვითარებისთვის ქვეყანამ საკრუიზო კომპანიების დასუბსიდირება გადაწყვიტა. ახალი სქემის მიხედვით, მთავრობა A კლასის კომპანიებს, რომელიც საკრუიზო ტურიზმში არიან ჩართულნი, თურქეთის ნებისმიერი პორტში ჩამოყვანილი თითო ტურისტისთვის 30 დოლარს გადაუხდის.
გადაწყვეტილება ძალაში 2017 წლის 31 დეკემბრამდეა და ის ისეთ გემებზეა გათვლილი, რომელსაც ბორტზე 750 მგზავრის აყვანა შეუძლია.
აღსანიშნავია, რომ თუქეთის პორტები ბოლო ორი წელია მსოფლიოს და ევროპის უმსხვილეს საკრუიზო კომპანიების ჩამონათვალში აღარ არის. მიზეზად კი უსაფრთხოებასთან დაკავშირებული პრობლემები სახელდება.
ცნობისათვის 2015 წელს თურქეთმა 1456 კრუიზული ლაინერი მიიღო, რომელმაც ქვეყანაში 1,8 მლნ ადამიანი შემოიყვანა.
გასულ, 2016 წელს კი თურქეთმა 590 საკრუიზო ლაინერს უმასპინძლა, რომლის ბორტზე 628 ათასი ტურისტი იმყოფებოდა.
2017 წლის აგვისტოს მონაცემებით კი თურქეთის პორტებმა 224 საკრუიზო ხომალდი მიიღო, რომელზედაც 213 ათასი მგზავრი იყო.
