ანგელა მერკელმა ხაზგასმით აღნიშნა, რომ გერმანულ-ქართული ურთიერთობები ღრამვდება, - ამის შესახებ საგარეო ურთიერთობების საკითხებში პრემიერ-მინისტრის მრჩეველმა თედო ჯაფარიძემ განაცხადა.
როგორც თედო ჯაფარიძემ საზოგადოებრივ მაუწყებელს განუაცხადა, ანგელა მერკელმა და მისმა გუნდმა იცოდნენ დეტალურად საქართველოში და საქართველოს ირგვლივ არსებული პროცესების შესახებ.
მისივე თქმით, ქართულმა მხარემ დაადასტურა მზადყოფნა, რომ იმ დადებით მომენტებთან ერთად, რასაც საქართველო ახორციელებს და, რასაც ქვეყნის მოდერნიზება ჰქვია, აუცილებელია, ოკუპაციის პრობლემების გადაჭრაზეც ერთად ვიფიქროთ.
"შეხვედრის დაწყებისას ჩვენ მივულოცეთ ქალბატონ მერკელს არჩევნებში გამარჯვება. დავიწყეთ საუბარი ორმხრივი ურთიერთობებით. ორივე მხარემ დადებითად შეაფასა ურთიერთობათა დინამიკა. ანგელა მერკელმა აღნიშნა, რომ გერმანულ- ქართული ურთიერთობები ღრმავდება. იყო საუბარი ევროპისკენ საქართველოს სვლაზე, ევროკავშირთან ურთიერთობებზე, რუსეთსა და იმ პრობლემებზე, რომლებიც საქართველოს რუსეთთან აქვს. დაწვრილებით მოვუყევით, თუ რა ხდება ყოველდღიურად ოკუპაციის კუთხით - მავთულხლართები, გაყოფილი სოფლები.
ჩემთვის მოულოდნელი იყო, რომ ქალბატონი მერკელი და მთელი მისი გუნდი, ვინც შეხვედრას ესწრებოდა, იყო უაღრესად კარგად მომზადებული. მათ იცოდნენ დეტალურად საქართველოში და საქართველოს ირგვლივ არსებული პროცესები. განვიხილეთ ეკონომიკური პროექტები, აბრეშუმის გზა. საუბარი შეეხო ჩინეთის, უზბეკეთისა და გერმანიის დაინტერესებას, რომ საქართველოს მეშვეობით ეს ურთიერთობები უფრო ინტენსიური გახდეს",- განაცხადა თედო ჯაფარიძემ.
