საკონსტიტუციო ცვლილებების საბოლოოდ დასამტკიცებლად მოწვეული პარლამენტის რიგგარეშე სხდომაზე იურიდიული კომიტეტის თავმჯდომარე ეკა ბესელიას კონსტიტუციის შეცვლის აუცილებლობა ,,ნაციონალური მოძრაობის“ პოლიტიკამ განაპირობა.
"თუ რამ განაპირობა კონსტიტუციის შეცვლის აუცილებლობა, ყველაზე კარგად იცის იმ პოლიტიკურმა ძალამ, რომელმაც ისე იძალადა ქვეყნის ძირითად კანონზე, როგორც ძალადობდნენ ადამიანები, რომლებსაც ჰქონდათ საკუთარი პირადი ინტერესები და ამის გამო არც ადამიანი და არც მისი უფლებები არაფრად არ მიაჩნდათ.
კონსტიტუციას, რომელსაც დღეს ჩვენ ვცვლით, თავი ადგას მიხეილ სააკაშვილის და ტანი არის კოლექტიური ნაციონალური მოძრაობა. ეს არის დღეს კონსტიტუცია, რომელსაც იმ დონის პოლიტიკური კრიზისების შექმნა შეუძლია, რომელიც ნებისმიერ დროს ნებისმიერი თანამდებობის პირის ხელში არის უსერიოზულესი ინსტრუმენტი ამოაყირავოს ქვეყანა ერთ მშვენიერ დღეს.
ყველაზე სამარცხვინო გამოხატულება ამისი საგარეო ძალიან სამარცხვინო კრიზისის იყო ის, ვინ სად წავიდოდა, რა ფორმატში და მოაწერდა ხელს ქვეყნისთვის უმნიშვნელოვანეს დოკუმენტს. დღეს ამ ცვლილებებს როდესაც ვადარებთ, რა პროცესი უძღოდა წინ და მე მახსოვს 53 შენიშვნა და ცვლილება შეტანილი კონსტიტუციაში, რომელსაც ის პოლიტიკური ძალა ახორციელებდა, რომელიც ახლა გველაპარაკება კონსტიტუციაზე ძალადობაზე, რომელიც ისე ცვლიდა კონსტიტუციას, რომ არც არავის ელაპარაკებოდა,
ვენეციის კომისიას მასხრად იგდებდა, მერე იმ დროის პრეზიდენტი მესიჯებს გვიკითხავდა პირდაპირ ეთერში, როგორ ოხუნჯობდა ვენეციის კომისიის პრეზიდენტთან, მერე ვენეციის კომისიას შეცვლილ დოკუმენტს უგზავნიდნენ, არა იმას, რაც იყო მიღებული, არამედ იმას, რაც თვითონ უნდოდათ, რომ მიეღოთ და კარს ჩაკეტავდნენ და არავის შიგნით არ უშვებდნენ, არა თუ საერთო სახალხო განხილვას. და ეს ხალხი ლაპარაკობს დღეს კონსტიტუციაზე ძალადობაზე. დღეს ამ ცვლილებებს აქვს ერთი სახელი, ეს არის ცვლილებები, რომელიც არ ემსახურება მმართველ ძალას", - თქვა ეკა ბესელიამ.
დღეს, უმრავლესობა კონსტიტუციის მესამე მოსმენით დამტკიცებას გეგმავს. საპარლამენტო ოპოზიციამ მწვავე დებატების შემდეგ, სხდომათა დარბაზი პროტესტის ნიშნად, ხმაურით დატოვა.
