„ნაციონალური მოძრაობის“ ერთ-ერთი ლიდერის, ნიკა მელიასა და „ქართული ოცნების“ წევრებს შორის პარლამენტის სხდომაზე სიტყვიერი დაპირისპირება მოხდა, რის შემდეგაც პროტესტის ნიშნად სხდომათა დარბაზი დატოვეს „ენმ"-ის წარმომადგენლებმა.
თავდაპირველად, სხდომის დატოვების გადაწყვეტილების გამოცხადების შემდეგ, დარბაზში პარტიის ერთ-ერთი ლიდერი ნიკა მელია უმრავლესობის წევრებს მიმართავდა, რის გამოც თამარ ჩუგოშვილმა განაცხადა, რომ მელია დარბაზში იწვევს ხმაურს და ჯერ თავად მას მოუწოდა დარბაზის დატოვებისკენ, შემდეგ კი მანდატურებს მიმართა, რომ მელია დარბაზიდან გაეყვანათ.
ამის შემდეგ, ”ნაციონალური მოძრაობის” კიდევ ერთი წევრი თინა ბოკუჩავა ტრიბუნასთან მდგარ პარლამენტის თავმჯდომარესთან, ირაკლი კობახიძესთან ავიდა და საკუთარი უკმაყოფილება დააფიქსირა. ამის შემდეგ თამარ ჩუგოშვილმა სხდომის 5-წუთით შეჩერების გადაწყვეტილება მიიღო.
ოპოზიციის პროტესტს მმართველმა გუნდმა პოლიტიკური მასკარადი უწოდა.
დღეს, უმრავლესობა კონსტიტუციის მესამე მოსმენით დამტკიცებას გეგმავს. ოპოზიციამ კი, ტრიბუნა სარედაქციო კითხვების ნაცვლად, უმრავლესობის კრიტიკისთვის გამოიყენა.
ფოტო ,,საზოგადოებრივი"
