თუ ერთხელ მაინც გიმგზავრიათ თვითმფრინავით, აუცილებლად შენიშნავდით მცირე ზომის ხვრელს ფანჯარაზე, რომლის არსებობის მიზეზიც ძალიან ბევრმა ადამიანმა არ იცის.
„საქაერონავიგაციაში“ განმარტავენ, რომ თვითმფრინავის კონსტრუქტორები ფანჯრებს რამდენიმე ფენა გამჭვირვალე აკრილის მასალისგან ამზადებენ, რაც იცავს მას დაზიანებებისგან. მათ შორის, გარეთა ფენა ყველაზე მყარია, მისი დაზიანება თითქმის შეუძლებელია. ხოლო შიდა ნაწილი შედარებით სუსტია. ფანჯრების ფენებს შორის არის ჰაერი. იმ შემთვევაში თუ თვითმფრინავი მოექცევა დიდი წნევის ქვეშ, შესაძლოა ფანჯარა დაზიანდეს, სწორედ ამის თავიდან ასაცილებლად უკეთებენ ფანჯრებს პატარა ხვრელს, რომელიც არეგულირებს წნევას ფანჯრების ფენებს შორის.
უსაფრთხოების გარდა, ფანჯრების ხვრელს აქვს კიდევ ერთი დანიშნულება, ის იცავს ფანჯრებს დაორთქვლისგან, რაც საშუალებას აძლევს მგზავრს თვალი ადევნოს ფრენას.
