საქართველოს ვიცე-პრემიერი, საგარეო საქმეთა მინისტრი მიხეილ ჯანელიძე 2017 წლის 25 სექტემბერს შეხვედრას გამართავს დიასპორის და კავკასიის საკითხთა საპარლამენტო კომიტეტის წარმომადგენლებთან.
მინისტრი კომიტეტის სხდომის მონაწილეებს ინფორმაციას მიაწვდის საგარეო საქმეთა სამინისტროს მიერ დიასპორასთან ურთიერთობების მიმართულებით გაწეული საქმიანობის, უკვე განხორციელებული და დაგეგმილი ღონისძიებებისა და არსებული ინიციატივების შესახებ.
საპარლამენტო ოპოზიციის წარმომადგენლები საგარეო საქმეთა მინისტრს იმ დოკუმენტაციის გასაჯაროებას მოსთხოვენ, რომლის მეშვეობითაც რუსეთს დახმარების ნოტა გაეგზავნა.
„ხანძრების დროს იყო რუსეთის მიმართ გაგზავნილი ნოტა და იყო მოთხოვნა დახმარებასთან დაკავშირებით, რასაც მალავდნენ და ბოლოს აღმოჩნდა, რომ ეს არის სიმართლე და დახმარებისთვის ურეკავდნენ რუსებს. ეს საკითხი არ უნდა დარჩეს ინტერესს მიღმა,“ - აცხადებს „ევროპული საქართველოს“ წევრი სერგო რატიანი.
საგარეო საქმეთა სამინისტრო დიასპორასთან ურთიერთობების საკითხებს ოფიციალურად 2017 წლის იანვრიდან კურირებს. საგარეო საქმეთა სამინისტროში შეიქმნა დიასპორასთან ურთიერთობის დეპარტამენტი და სხვა პროექტებთან თუ პროგრამებთან ერთად, პირველად შემუშავდა დიასპორის სახელმწიფო სტრატეგია, რომელიც მიზნად ისახავს ქართული დიასპორის გაძლიერებას და ერთიანობას და მათ მეტ ჩართულობას საქართველოს აღმშენებლობის საქმეში.
