აჭარის სოფლის მეურნეობის სამინისტროს 2018 წლის ბიუჯეტი უპრეცედენტო იქნება და 13 მილიონ 450 ათასი ლარს გადააჭარბებს. სამინისტროს ინფორმაციით, მიმდინარე წლის ბიუჯეტთან შედარებით გაზრდილია 1 421 242 ლარით. მთლიან ბიუჯეტის 79% პროგრამულ წილია და 10 მილიონ 588 ათასი ლარია.
მომავალ წელს სამინისტრო ქობულეთსა და ხელვაჩაურში 50 ცალ 500 კვ.მ. სათბურს გააკეთებს. ერთ-ერთი ყველაზე რთული, რაც რძის მწარმოებელ ფერმერებს აქვთ, რძის ფერმერებისგან გადამამუშავებელ პუნქტამდე მიტანაა. სამინისტრო მომავალ წელს შექმნის რძის მოგროვების და გადამამუშავებელთან მიწოდების სისტემას. რძის 2 მიმღები პუნქტი გაკეთდება, რომლის სიმძლავრეც ჯამში 20 ტონა რძე იქნება.
30%-იანი თანამონაწილეობით ფერმერებზე გაიცემა ნიორი სარგავი მასალა, რომელიც 16.63 ჰექტარზე დაითესება.
სამინისტრო მნიშვნელოვან აქცენტს აკეთებს ჩაქვის, გავარას და ხუცუბნის სანერგე მეურნეობის განვითარებაზე. ამ მიმართულებით მომავალ წელს 983 ათასი ლარი დაიხარჯება.
სანერგე, საჩითილე, სანაშენე და აგრომომსახურეობის ცენტრი გაკეთდება შუახევში, რომლის ბიუჯეტიც დაახლოებით 1 755 000 ლარია.
მეცხოველებაში, მემცენარეობასა და მეთევზეობაში ექსტენციისთვის (სწავლება-კონკულტირება) 250 ათას ლარამდე დაიხარჯება.
სამინისტრო აპარატსა და დაქვემდებარებულ აიპებში სტუდენტთა ფასიან სტაჟირების პროგრამასაც განახორციელებს. ჩატარდება ფორუმები და ფესტივალები.
საერთაშორისო სტანდარტების დანერგვის ხელშეწყობისთვის (ISO სტანდარტი) 163 ათასი ლარია გამოყოფილი.
მომავალ წელს სამინისტრო 163 ჰა-ზე მრავალწლიანი ბაღების გაშენების პროგრამას იწყებს. ასევე მცენარეთა დაცვის ღონისძიებების გაუმჯობესების მიზნით მოსახლეობას თანადაფინანსების პრინციპით მობილური შემასხურებელი აპარატები გადაეცემა. ასევე 2018 წელს სიახლე იქნება ნიადაგის ნაყოფიერების ამაღლების ხელშეწყობის პროგრამა, რომლის ფარგლებშიც ფერმერებს 1400 ჰექტარზე 1500 ტონა ფოსფორიანი სასუქი გადაეცემათ.
აგროსექტორის საჭიროებათა 4 კვლევა ჩატარდება, სადაც გამოჩნდება რა საჭიროებები არის აგრო მიმართულებით რეგიონში. აღნიშნული კვლევა სამინისტროს დაეხმარება სახელმწიფო თანხების სწორ და ეფექტურ ხარჯვაში. ასევე შემუშავდება აქტიურ მოქალაქეთა ადგილობრივი გაერთიანებების (ამაგების) სტრატეგიული დოკუმენტი, რაც 46 ამაგის, სადაც 702 აქტიური მოქალაქეა გაერთიანებული, სამომავლო პერსპექტივის და ეფექტურობის ამაღლებაში.
სულ 2018 წელს სამინისტროსგან 9 პროგრამა განხორციელდება.
