"ევროპული საქართველოს" ერთ-ერთი ლიდერის, ირაკლი აბესაძის განცხადებით, სამწუხაროა, რომ "ნაციონალურმა მოძრაობამ" ჭორაობის გზა აირჩია და ყოფილ თანაგუნდელებს დაესხა თავს.
მისივე თქმით, ხელისუფლების მთავარი მიზანიც ის არის, რომ ოპოზიციურ პარტიებს შორის დაპირისპირება მოხდეს.
"ძალიან სამწუხაროა, რომ "ნაციონალური მოძრაობის" ლიდერების მხრიდან ადგილი აქვს ჭორაობას, რომელიც არანაირ მტკიცებულებას არ ემყარება. ხელისუფლების მთავარი მიზანიც ის არის, რომ ოპოზიციურ პარტიებს შორის დაპირისპირება მოხდეს და ხელისუფლების უკანონო ქმედებებზე კონცენტრირებული არავინ იყოს. ამ შემთხვევაში, ნაცვლად იმისა, რომ ერთიანი ფრონტით ვიბრძოდეთ ყველა პოლიტიკური დევნილის ინტერესების დასაცავად და ხელისუფლების უკანონო ქმედების საწინააღმდეგოდ, სამწუხაროდ " ნაციონალურმა მოძრაობამ" ჭორაობის გზა აირჩია და ყოფილ თანაგუნდელებს დაესხა თავს", - განაცხადა აბესაძემ.
შეგახსენებთ, "ნაციონალური მოძრაობის“ ერთ-ერთმა ლიდერმა ნიკა მელიამ დღეს განაცხადა, რომ თავდაცვის ყოფილი მინისტრი დავით კეზერაშვილი, რომელმაც ყაჩაღობით, ქურდობით და ძარცვით იშოვა ფული, დღეს „ევროპულ საქართველოს“ აფინანსებს.
ნიკა მელიას განცხადებას "ევროპული საქართველოს" კიდევე ერთი წევრი, ოთარ აბესაძეც გამოეხმაურა და განაცხადა, რომ ნიკა მელია "ასავალ-დასავალის" დონემდე დავიდა.
