მატარებელი, სადაც მიხეილ სააკაშვილი მხარდამჭერებთან და ოჯახის წევრებთან ერთად იმყოფება, პოლონეთიდან ლვოვის მიმართულებით ამ დრომდე არ დაძრულა. ,,საზოგადოებრივის“ ინფორმაციით, მატარებელში პერიოდულად აცხადებენ, რომ ბოდიშს იხდიან შეფერხებისთვის. სადგურის ადმინისტრაციაში ამბობენ, რომ მატარებელში იმყოფება პერსონა, რომელსაც უკრაინაში ლეგალურად შესვლის უფლება არ აქვს.
ამასთან, ცნობილი ხდება, რომ დანარჩენი მგზავრები უკრაინაში შესაძლოა ავტობუსებით გადაიყვანონ და მატარებელმა დაგეგმილი რეისი არ შეასრულოს. ვრცელდება ინფორმაცია, რომ უკრაინიდან მგზავრების გადასაყვანად პოლონეთში ავტობუსები უკვე გაიგზავნა.
ცოტა ხნის წინ, მიხეილ სააკაშვილმა ადგილზე მყოფ ჟურნალისტებს განუცხადა, რომ პოლონეთის ხელისუფლების გადაწყვეტილებით, ლვოვის მიმართულებით მატარებელი რამდენიმე წუთში გაემგზავრებოდა.
მიხეილ სააკაშვილი უკრაინაში დაბრუნებას პოლონეთიდან სწორედ მატარებლით აპირებს. თავდაპირველად უკრაინაში ჩასვლას ავტობუსით გეგმავდა, თუმცა მოგვიანებით გადაწყვეტილება შეცვალა და მატარებლით გამგზავრება გადაწყვიტა.
რეისი ლვოვის მიმართულებით თბილისის დროით 15:07 საათზე უნდა შესრულებულიყო.