საკუთარ სახლში მომხდარი ხანძრის გამომწვევ მიზეზებზე საუბარი უჭირს პარტია „დემოკრატიული მოძრაობის“ წევრ დიმიტრი ლორთქიფანიძეს. როგორც „ჯი-ეიჩ-ენ-თან“ საუბარში ლორთქიფანიძე აცხადებს, ის დივერსიასაც არ გამორიცხავს.
„გამორიცხული არაფერია, მითუმეტეს, საჯარო პირი ვარ და საჯარო პოლიტიკაში ვარ, თან მკვეთრად განსხვავებული პოზიციები გამაჩნია. თუმცა, ამ თემის სპეკულირებას მოვერიდები. სანამ ექსპერტიზით არ დადგინდება ხანძრის გამომწვევი მიზეზი, რომელიც ნებისმიერი რამ შეიძლება იყოს, დაწყებული ძაბვის მოვარდნით, დივერსიით დამთავრებული, ვერსიების გაჟღე რებისგან თავს შევიკავებ“, - განაცხადა ლორთქიფანიძემ.
სახლი, რომელშიც ლორთქიფანიძის ცოლ-შვილი და სიდედრი იმყოფებოდნენ, მთლიანად დაიწვა.
„ჩვენი აგარაკი ჟინვალის მახლობლად, დუშეთის რაიონში მდებარეობს. იქ ზაფხულობით ჩავდივართ ხოლმე. ამჯერადაც, იქ ჩემი მეუღლე, სიდედრი და სამი პატარა ბავშვი იმყოფებოდა. მე დანარჩენ შვილებთან ერთად თბილისში ვიყავი. მეუღლე საშინელმა კვამლმა გააღვიძა, რომელიც მას ფატქობრივად ახრჩობდა. როცა ფეხზე წამოდგა, ოთახში საკმაოდ დიდი დაკვამლიანება იყო, ბავშვს ხელი მოკიდა, დერეფანში გასვლა სცადა, მაგრამ დიდი რაოდენობის კვამლმა ის ფაქტობრივად ჩახუთა, აივნისკენ წასვლა ძლივს მოახერხა.
01:40 საათზე კივილით დამირეკა, ვიწვით, მიშველეო. დაახლოებით, 02:30 საათზე უკვე იქ ვიყავი. ადგილზე 4 სახანძრო მანქანა, სასწრაფო დახმარების ბრიგადები, პოლიციის მანქანები დამხვედა, ცეცხლის ქრობა ინტენსიურად მიმდინარეობდა. ჩემი სახლი მთლიანად იწვოდა, როგორც ასანთის კოლოფი, მთლიანად იყო სახლი ცეცხლში გახვეული.
მეზობლმა გმირულად, კიბის საშუალებით, ცეცხლმოკიდებული სახლის მეორე სართულის აივნიდან, ჩემი მეუღლე, ბავშვები და სიდედრი გამოიყვანა, ამან გადამირჩინა ისინი. მადლობა ღმერთს, ყველანი ცოცხლები დარჩნენ. პატარა ბავშვი ფსიქოლოგიურად ძალიან რთულ მდგომარეობაში იყო, ნაწილობრივ ინტქოსიკაციაც ჰქონდა, ძალიან მძიმედ იყო ჩემი სიდედრიც.
როგორც ჩემები იხსენებენ, ხანძრის კერა, პირველ სართულზე იყო. სამწუხაროდ, სახლი მთლიანად დაიწვა. სახანძრო ჯგუფებმა ხანძრის დროულად ლოკალიზება ვერ შეძლეს. ღამის 2 საათზე დაწყებული ქრობა დილის 8-ის ნახევარზე დამთავრდა. სახანძრო-ტექნიკური ექსპერტიზა ჩატარდა, ველოდებით შედეგებს“, - განუცხადა „ჯი-ეიჩ-ენს“ დიმიტრი ლორთქიფანიძემ.
ცნობისათვის, დიმიტრო ლორთქიფანიძის სახლს ხანძარი 5 სექტემბერს გაუჩნდა. არნიშნულთან დაკავშირებით ლორთქიფანიძე და მისი მეუღლე სამართალდამცავებმა უკვე დაკითხეს.
