მნიშვნელოვანია, რომ ევრობანკი მხარს უჭერს ჩვენს პოლიტიკას და ამის გამოხატულება გახლავთ სწორედ ის, რომ მათი სტრატეგია არის პირდაპირ მორგებული ოთხპუნქტიანი გეგმის დღის წესრიგზე, რაც ჩვენთვის მნიშვნელოვანია, - ამის შესახებ საქართველოს პრემიერ-მინისტრმა, გიორგი კვირიკაშვილმა მთავრობის სხდომაზე განაცხადა.
მისი თქმით, 2016 წლის განმავლობაში ამ საფინანსო ინსტიტუტმა განახორციელა 17 პროექტი და 250 მილიონი ევროს ინვესტიცია, რაც უპრეცედენტოა და ეს არის რეკორდული მაჩვენებელი.
„მინდა, გამოვეხმაურო ევროპის რეკონსტრუქციისა და განვითარების ბანკის პრეზიდენტის, სერ სუმა ჩაკრაბარტის ვიზიტს საქართველოში და მინდა, მადლობა გადავუხადო ევრობანკს, პირადად ბატონ პრეზიდენტს და მთელ გუნდს საქართველოს განვითარების მხარდაჭერისათვის, ჩვენს მიერ აღებული კურსის მხარდაჭერისათვის. ევროპის რეკონსტრუქციისა და განვითარების ბანკი არის საქართველოს უმნიშვნელოვანესი პარტნიორი. 2016 წლის განმავლობაში ამ საფინანსო ინსტიტუტმა განახორციელა 17 პროექტი და 250 მილიონი ევროს ინვესტიცია, რაც უპრეცედენტოა და ეს არის რეკორდული მაჩვენებელი", - განაცხადა პრემიერ-მინისტრმა.
მისივე თქმით, ჩაკრაბატიმ გააჟღერა გზავნილები, რომლებიც ეხება საქართველოს ეკონომიკური ზრდის პროგნოზებს და დაადასტურა, რომ საქართველო გადააჭარბებს ევრობანკის მიერ პროგნოზირებულ მაჩვენებელს, რაც მნიშვნელოვანია.
"მნიშვნელოვანია მათი მხარდაჭერა ისეთ სფეროებში, როგორიც არის ენერგეტიკა, მუნიციპალური ინფრასტრუქტურა, მცირე და საშულო ბიზნესის განვითარება, კონკრეტულად პროგრამები, რომლებიც ორიენტირებულია საქართველოს ევროპასთან დაახლოების პროცესის მხარდაჭერაში არის მნიშვნელოვანი. კონკრეტულად, საქართველოს საექსპორტო პოტენციალის განვითარება, რომელიც ორიენტირებულია ევროპასთან თავისუფალი ვაჭრობის ხელშეკრულების პოტენციალის ათვისებაზე და ა.შ. მნიშვნელოვანია, რომ ევრობანკი მხარს უჭერს ჩვენ მიერ აღებულ პოლიტიკას და ამის გამოხატულება გახლავთ სწორედ ის, რომ მათი სტრატეგია არის პირდაპირ მორგებული ოთხპუნქტიანი გეგმის დღის წესრიგზე, რაც ჩვენთვის მნიშვნელოვანია. ჩაკრაბატიმ გააჟღერა გზავნილები, რომლებიც ეხება საქართველოს ეკონომიკური ზრდის პროგნოზებს და დაადასტურა, რომ საქართველო გადააჭარბებს ევრობანკის მიერ პროგნოზირებულ მაჩვენებელს, რაც მნიშვნელოვანია. ასევე გზავნილები, რომლებიც ეხება საქართველოს პოზიციებს საერთაშორისო რეიტინგებში, რომელიც ბოლო წლებში გაუმჯობესდა, არის მნიშვნელოვანი, განსაკუთრებით ისეთ პიროვნების მხრიდან, რომელსაც საინტვესტიციო სამყარო ყურადღებით უსმენს. კიდევ მადლობა ევრობანკის პრეზიდენტს, საქართველოში ვიზიტისათვის, მთლიანად ამ გუნდს საქართველოს განვითარების მნიშვნელოვანი მხარდაჭერისთვის“, - აღნიშნა საქართველოს პრემიერმა.
