უკრაინის მესამე პრეზიდენტი ვიქტორ იუშჩენკო უკრაინა-პოლონეთის საზღვარზე ვერ იცნეს. ინციდენტი კიევი-პშემისლის მატარებელში მოხდა, რითაც ვიქტორ იუშჩენკო მგზავრობდა.
„პოლონეთის საზღვარზე, პრეზიდენტ იუშჩენკოსთან მოდის მესაზღვრე და ძალიან თავაზიანად ეუბნება: თქვენ ძალიან გავხართ ბატონ პრეზიდენტს. ეს თქვენთვის დიდი კომპლიმენტია პატივცემულო. ვიქტორ ანდრიოვიჩმა თვალები დახარა: დიახ, ვგავარ. დუმს.
ამ დროს კი სხვა მგზავრებმა, რომლებმაც პრეზიდენტთან მეგობრული ფოტოები უკვე გადაიღეს და მგზავრობისას პრეზიდენტთან საუბარში 7 საათი გაატარეს, ერთხმად წამოიძახეს: ეი! ეს არის ჩვენი პრეზიდენტი. ვერ ცნობთ? თქვენ კი ამ დროს ამ პოლონელი მესაზღვრის სახე უნდა გენახათ“, წერს Facebook-ის გვერდზე ქვეყნის მეთაურის ყოფილი პრესმდივანი ირინა ვანნიკოვა.
მისი თქმით, მესაზღვრემ ვერ დაიჯერა, რომ პრეზიდენტი მატარებლით მგზავრობდა და დასარწმუნებლად ვიქტორ იუშენკოს პასპორტის ჩვენება მოუწია.
„მესაზღვრე კოლეგების დასაძახებლად გაიქცა. ერთობლივი ფოტოები გადაიღეს. პოლონელმა მესაზღვრეებმა იუშენკოს 2008 წელს საქართველოს მხარდაჭერისთვის და ლეხ კაჩინსკისთან მეგობრობისთვის მადლობა გადაუხადეს“, წერს პრესმდივანი.
