დავით ოქიტაშვილს საქართველოს პროფესიული კავშირების გაერთიანების თავმჯდომარეობა სურს. კულტურის პალატის პრეზიდენტი და ხელოვნების მუშაკთა პროფესიული კავშირის თავმჯდომარე აცხადებს, რომ ირაკლი პეტრიაშვილს დაამარცხებს.
„2012 წლის მერე, როდესაც ახალი ხელისუფლება მოვიდა, მეგონა, რომ ის შეცვლიდა თავის მეთოდებს და პროფკავშირი თავის ხალხს დაუბრუნდებოდა. პირიქით, 2012 წლის მერე უფრო დიქტატორი გახდა. მე ვიბრძოლებ და დარწმუნებული ვარ, 15 თუ 16 სექტემბერს, არ ვიცი, კიდევ თუ არ შეცვალა ყრილობის თარიღი, მე მას დავამარცხებ,“- განაცხადა დავით ოქიტაშვილმა.
თანამდებობის შესანარჩუნებლად, პროფკავშირების მოქმედი ხელმძღვანელი, ირაკლი პეტრიაშვილიც იბრძოლებს. მისი თქმით, დავით ოქიტაშვილის კანდიდატად გამოჩენა არის ხელისუფლების მიერ მის წინააღმდეგ წამოწყებული კამპანიის ნაწილი, მას შემდეგ, რაც ის რკინიგზას დაუპირისპირდა და მოშიმშილეებს მხარი დაუჭირა.
