ქედაში ტურისტულ საინფორმაციო ცენტრში პირველი აგროპედია დამონტაჟდა. აგროპედია წარმოადგენს აგრო-ბიბლიოთეკას, რომელიც მოთავსებულია ე.წ. თაჩ სქრინში, სადაც მოცემულია 1000-მდე სტატია და მასალა სხვადასხვა აგრო ღონისძიებისა თუ სერვისის შესახებ. იგი საპილოტე-სადემოსტრაციო პროექტია, რომელიც ქედის მუნიციპალიტეტში დამონტაჟდება და მისი ღირებულება 5 700 ლარს შეადგენს.
აგროპედია არის აგრო-საექსტენციო (სწავლება/კონსულტირება) სერვისების გაძლიერებაზე ორიენტირებული სრულიად ინოვაციური მექანიზმი, რომელიც განკუთვნილია ფერმერებისა და სპეციალისტებისათვის და მის მიზანს წარმოადგენს სოფლის მეურნეობის მიმართულებით საჭირო საკონსულტაციო სერვისების წარმოება და საჭირო ინფორმაციასა და რეკომენდაციებზე წვდომის გამარტივება.
აღსანიშნავია, რომ ამ სახის მექანიზმით შესაძლებელია საჭირო ინფორმაციის ეფექტური გავრცელება და აგრო-საკონსულტაციო სფეროში არსებული ინფორმაციული ვაკუუმის პრობლემის გადაჭრა, მაქსიმალურად მცირე დანახარჯებით. მეთოდი ინოივაციურია და იგი არ გამოუყენებია არც ერთ სხვა ქვეყანას.
აგროპედიას გააჩნია უკუკავშირის მექანიზმი, ანუ ნებისმიერ დაინტერესებულ პირს შეუძლია მოითხოვოს და მიიღoს მისთვის საჭირო ინფორმაცია და რეკომენდაციები სოფლის მეურნეობის მიმართულებით.
ტექნიკური თვალსაზრისით სამომავლოდ იგეგმება, აგროპედიის რიცხვის გაზრდა და ისეთი ახალი ფუნქციების დამატება, როგორიცაა ვიდეო-კითხვების დასმის ფუნქცია, დივერსიფიცირებული მართვა და ა.შ.
ამჟამად აგროპედიაში ინფორმაციის განახლება ხდება. ამ დროისთვის მასზე ჩატვირთულია სოფლის მეურნეობის შესახებ 1000-ზე მეტი სტატია, თუმცა პროცესის დასრულების შემდეგ მასზე სტატიების და მასალების მინიმალური ოდენობა 2000-ს გადააჭარბებს.
პროექტი ხორციელდება გაეროს განვითარების პროგრამის მიერ, ევროკავშირის ფინასური მხარდაჭერით „სოფლის განვითარების ხელშეწყობა“ პროექტის ფარგლებში.
