ცხინვალის სეპარატისტულმა ხელისუფლებამ ხანძარსაწინააღმდეგო თხრილები წინასწარ გააკეთა, - ამის შესახებ ევროპელი დემოკრატების ლიდერმა პაატა დავითაიამ განაცხადა. მისი თქმით, ჩნდება გონივრული ეჭვი, რომ საქმე გვაქვს დივერსიულ აქტთან. დავითაიამ 3 აგვისტოს, ცხინვალის უშიშროების პრესსამსახურის მიერ გავრცელებული განცხადება გაიხსენა, სადაც საუბარია, რომ საქართველოში ძალიან მალე იქნება დიდი ხანძრები.
დავითაიამ ასევე წარადგინა საოკუპაციო რეჟიმის წარმომადგენლების აუდიო მასალაც და მიმართა საქართველოს მთავარ პროკურატურას, მურატ ჯიოევის მიერ მიცემულ ინტერვიუსთან დაკავშირებით დაიწყოს გამოძიება.
„საიდან იცოდა სეპარატისტულმა ხელისუფლებამ რომ დაიწყებოდა ხანძრები თუ ჩვენ საქმე არ გვაქვს დივერსიასთან. მიდიოდა თუ არა სპეციალური მზადება ამ თხრილების გაკეთებაზე, რომელიც ოკუპირებული ტერიტორიების მიერთებას უსვამს ხაზს და სიტუაციას ძაბავს. თუ ჩვენ არ გვაქვს მიზანმიმართულ ქმედებასთან საქართველოს წინააღმდეგ, თუ ჩვენ არ გვაქვს დივერსიული აქტების მზადებასთან საქმე და რეალურად საფუძვლიანი ეჭვი გადადის იმ მტკიცებულებების ფორმატში, რასაც ჰქვია წინასწარ 3 აგვისტოს ინფორმაციის გავრცელება დაწყებულ ხანძრებთან დაკავშირებით. მოვუწოდებ საქართველოს მთავარ პროკურატურას დაიწყოს გამოძიება ამ ფაქტზე,“-განაცხადა პაატა დავითაიამ.